khuli fazaon ka ahd-nama

lahū kī bārish

zamīn ke siine pe muddatoñ se baras rahī thī

lahū meñ Duube hue kabūtar fazā meñ arse se uḌ rahe the

fazā meñ jalte lahū kī ḳhushbū bikhar chukī thī

har ek gosha

har ek qarya

añdherī shab ke muhīb saa.e meñ ghir chukā thā

har ek insān mar chukā thā

lahū kī bārish thamī to dekhā ki ek insān

zamīñ ke logoñ se kah rahā hai

ki ḳhvāb-e-ġhaflat se jaag jaao

mohabbatoñ ke diye jalā kar har ek goshe ko jagmagāo

uTho ki tum hī añdherī shab ke muhīb sāyoñ kī chāñdnī ho

uTho ki tum hī sadāqatoñ ke mohabbatoñ ke payāmbar ho

tum ek ho kar uTho ki tum ko tumhārā dushman bhī jaan jaa.e

tum hī ho sūraj tum hī sitāre

tum hī samundar tum hī kināre

sab ek ho kar uThe to dekhā

gulāb-ḳhushbū fazā meñ har-sū mahak rahī thī

har ik kabūtar falak pe sūraj sā lag rahā thā

har ek goshe meñ raushnī ke hasīn jugnū chamak rahe the

ye din bhī kaisā ajiib din thā

mohabbatoñ kā

sadāqatoñ kā

ki us din ham se hamāre qaa.id ne ye kahā thā

ham ek ho kar ye ahd kar leñ

khulī fazāoñ meñ saañs leñge

vatan kī ḳhātir hī jaan deñge

lahu ki barish

zamin ke sine pe muddaton se baras rahi thi

lahu mein Dube hue kabutar faza mein arse se uD rahe the

faza mein jalte lahu ki KHushbu bikhar chuki thi

har ek gosha

har ek qarya

andheri shab ke muhib sae mein ghir chuka tha

har ek insan mar chuka tha

lahu ki barish thami to dekha ki ek insan

zamin ke logon se kah raha hai

ki KHwab-e-ghaflat se jag jao

mohabbaton ke diye jala kar har ek goshe ko jagmagao

uTho ki tum hi andheri shab ke muhib sayon ki chandni ho

uTho ki tum hi sadaqaton ke mohabbaton ke payambar ho

tum ek ho kar uTho ki tum ko tumhaara dushman bhi jaan jae

tum hi ho suraj tum hi sitare

tum hi samundar tum hi kinare

sab ek ho kar uThe to dekha

gulab-KHushbu faza mein har-su mahak rahi thi

har ek kabutar falak pe suraj sa lag raha tha

har ek goshe mein raushni ke hasin jugnu chamak rahe the

ye din bhi kaisa ajib din tha

mohabbaton ka

sadaqaton ka

ki us din hum se hamare qaid ne ye kaha tha

hum ek ho kar ye ahd kar len

khuli fazaon mein sans lenge

watan ki KHatir hi jaan denge