KHushbu

kisī ehsās ko bedār kartī dil-nashīñ ḳhushbū

kahīñ bārish kī būñdoñ se nikaltī ret kī ḳhushbū

mo'attar kartī yādoñ ko kisī

mānūs se ik 'itr kī ḳhushbū

kabhī dul.han ke hāthoñ se uThe rang-e-hinā ban kar bikharte ḳhvāb

kī ḳhushbū

kahīñ raushan mazāroñ par agarbattī se phūloñ se du'āoñ ke jazīre se juḌī ik zaat kī ḳhushbū

bahut nauha-kunāñ girya-kunāñ har dam mahaktī sī kisī kī qabr par phaile hue taaza gulāboñ kī bahut vīrān sī ḳhushbū

juḌī ik yaad se ḳhushbū

bahut nāyāb hotī hai

mo'attar ruuh ko kar de

purāne zaḳhm sab bhar de hasīñ lamhāt kī ḳhushbū

to phir ye bhī yaqīnī hai

'atā ehsās ko ye lams kā

bhī mo'jiza de kar bahut masrūr

rakhtī hai

kisi ehsas ko bedar karti dil-nashin KHushbu

kahin barish ki bundon se nikalti ret ki KHushbu

mo'attar karti yaadon ko kisi

manus se ek 'itr ki KHushbu

kabhi dulhan ke hathon se uThe rang-e-hina ban kar bikharte KHwab

ki KHushbu

kahin raushan mazaron par agarbatti se phulon se du'aon ke jazire se juDi ek zat ki KHushbu

bahut nauha-kunan girya-kunan har dam mahakti si kisi ki qabr par phaile hue taza gulabon ki bahut viran si KHushbu

juDi ek yaad se KHushbu

bahut nayab hoti hai

mo'attar ruh ko kar de

purane zaKHm sab bhar de hasin lamhat ki KHushbu

to phir ye bhi yaqini hai

'ata ehsas ko ye lams ka

bhi mo'jiza de kar bahut masrur

rakhti hai