KHwab-e-hasin

tire gulāb se hoñToñ kī tāzgī kī qasam

bahār kī koī aahaT sunā.ī detī hai

nazar kī jhiil meñ mujh ko utārne vaale

hayāt aur bhī rañgīñ dikhā.ī detī hai

abhī abhī ye hasīñ ḳhvāb maiñ ne dekhā hai

agarche tum mire itne qarīb aa.ī ho

ki tum ko chhū luuñ to shāyad hī chhū sakūñ yā phir

nazar jo tum se milā.ūñ yaqīñ na thā is kā

javāñ hai raat hasīñ chāñdnī hasīñ taare

falak pe duur kahīñ kahkashāñ sī bikhrī hai

surūr-o-kaif meñ Duubī huī hai bād-e-sabā

hayāt bhī to simaT kar hai phailī phailī sī

fazā.eñ pyaar kī ḳhushbū se sab mo.attar haiñ

mohabbatoñ ke qadam āsmāñ se uupar haiñ

uThī nigāh to ye arsh se pare dekhā

ḳhalā meñ ambarīñ ḳhushbū ke ḳhushnumā bādal

bane haiñ ek sarāpā hasīn paikar kā

utar rahe haiñ zamīñ par tirā vajūd liye

samā rahe haiñ mire jism-o-jāñ ke yuuñ andar

mirā vajūd bhī terā vajūd ho jaise

uḌā rahe haiñ hameñ apne dosh par le kar

zamīñ se duur kahīñ āsmāñ kī choTī par

khulī jo aañkh to ye ḳhvāb-e-dilbarī TuuTā

tumhārā saath usī moḌ par kahīñ chhūTā

batāo kyā hai mire ḳhvāb kī hasīñ ta.abīr

tumhī batāo mire ḳhvāb kī hasīñ ta.abīr

tere gulab se honTon ki tazgi ki qasam

bahaar ki koi aahaT sunai deti hai

nazar ki jhil mein mujh ko utarne wale

hayat aur bhi rangin dikhai deti hai

abhi abhi ye hasin KHwab main ne dekha hai

agarche tum mere itne qarib aai ho

ki tum ko chhu lun to shayad hi chhu sakun ya phir

nazar jo tum se milaun yaqin na tha is ka

jawan hai raat hasin chandni hasin tare

falak pe dur kahin kahkashan si bikhri hai

surur-o-kaif mein Dubi hui hai baad-e-saba

hayat bhi to simaT kar hai phaili phaili si

fazaen pyar ki KHushbu se sab moattar hain

mohabbaton ke qadam aasman se upar hain

uThi nigah to ye arsh se pare dekha

KHala mein ambarin KHushbu ke KHushnuma baadal

bane hain ek sarapa hasin paikar ka

utar rahe hain zamin par tera wajud liye

sama rahe hain mere jism-o-jaan ke yun andar

mera wajud bhi tera wajud ho jaise

uDa rahe hain hamein apne dosh par le kar

zamin se dur kahin aasman ki choTi par

khuli jo aankh to ye KHwab-e-dilbari TuTa

tumhaara sath usi moD par kahin chhuTa

batao kya hai mere KHwab ki hasin tabir

tumhi batao mere KHwab ki hasin tabir