KHwab ke panw nahin hote hain

zindagī reshmīñ qālīn nahīñ hotī

ḳhvāb ke paañv bhī hote haiñ kahāñ

aur tamannā.eñ bhī āñkheñ nahīñ rakhtīñ

phir bhī

ḳhvāb chalte haiñ

bahut duur talak chalte haiñ

roz

nā-bīnā tamannāoñ kī unglī thāme

phir

kisī sā.at-e-nā-purs ke gumbad ke tale

dasht-e-tāsīr kī be-gosh panāhoñ meñ kahīñ

jaane kis

jazba-e-māsūm kī mauhūm sī chīḳh

ghuT ke rah jaatī hai ḳhud apne gulū ke andar

sirf ik taaza lahū kī ḳhushbū

sard pur-āb fazāoñ meñ bikhar jaatī hai

sar se pā tak jab usī ḳhuuñ meñ nahā jaate haiñ

ḳhvāb-e-nādīda thake paañv se lauT aate haiñ

zindagi reshmin qalin nahin hoti

KHwab ke panw bhi hote hain kahan

aur tamannaen bhi aankhen nahin rakhtin

phir bhi

KHwab chalte hain

bahut dur talak chalte hain

roz

na-bina tamannaon ki ungli thame

phir

kisi saat-e-na-purs ke gumbad ke tale

dasht-e-tasir ki be-gosh panahon mein kahin

jaane kis

jazba-e-masum ki mauhum si chiKH

ghuT ke rah jati hai KHud apne gulu ke andar

sirf ek taza lahu ki KHushbu

sard pur-ab fazaon mein bikhar jati hai

sar se pa tak jab usi KHun mein naha jate hain

KHwab-e-nadida thake panw se lauT aate hain