KHwab

mujh ko lauTā de mirā maazī ki vaqt-e-sang-dil

aaj maiñ bhī ai dil-e-afsurda thoḌā sabr kar

tujh se poshīda nahīñ maiñ kis qadar majbūr huuñ

aaj maiñ bhī tere kūche kā gadāgar ban gayā

ab kahāñ vo valvale maiñ ik shikastoñ kā mazār

ban ke rāh-e-justujū meñ rah gayā huuñ aaj ġham

merī nākāmī ke afsāne sunā.egā mujhe

vaqt thā jab ek aalam mere qadmoñ ke nishāñ

DhūñDhtā phirtā thā har vīrāna o har shahr meñ

aur tū hairāñ thā merī tezī-e-raftār par

yaad hai tujh ko mirī parvāz kā aalam ki jab

raat bhar mere ta.āqub meñ falak kā kārvāñ

gāmzan rahtā thā aur maiñ ne sahar se bhī pare

ik na.ī duniyā banā lī thī na.ī duniyā-e-shauq

kyoñ tirī taqdīr meñ thā aisā koī inqalāb

kyoñ tirī taufīq meñ aisī koī taḳhlīq thī

ḳhvāb merā pairahan the ḳhvāb merī zindagī

ḳhvāb mere ham-safar the ḳhvāb mere rahnumā

maiñ faqat ik ḳhvāb thā lekin mukammal ḳhvāb thā

mujh ko lauTa de mera mazi ki waqt-e-sang-dil

aaj main bhi ai dil-e-afsurda thoDa sabr kar

tujh se poshida nahin main kis qadar majbur hun

aaj main bhi tere kuche ka gadagar ban gaya

ab kahan wo walwale main ek shikaston ka mazar

ban ke rah-e-justuju mein rah gaya hun aaj gham

meri nakaami ke afsane sunaega mujhe

waqt tha jab ek aalam mere qadmon ke nishan

DhunDhta phirta tha har virana o har shahr mein

aur tu hairan tha meri tezi-e-raftar par

yaad hai tujh ko meri parwaz ka aalam ki jab

raat bhar mere taaqub mein falak ka karwan

gamzan rahta tha aur main ne sahar se bhi pare

ek nai duniya bana li thi nai duniya-e-shauq

kyon teri taqdir mein tha aisa koi inqalab

kyon teri taufiq mein aisi koi taKHliq thi

KHwab mera pairahan the KHwab meri zindagi

KHwab mere ham-safar the KHwab mere rahnuma

main faqat ek KHwab tha lekin mukammal KHwab tha