KHwab

vo ḳhvāb ki jin meñ jaltī thī sham.eñ tere ruḳhsāroñ kī

vo ḳhvāb ki jin meñ bantī thī tasvīr mire shahkāroñ kī

vo ḳhvāb ki jin kī tāqat se duniyā kā ruup badalnā thā

vo ḳhvāb ki jin kī ThanDak meñ sho.aloñ par mujh ko chalnā thā

vo ḳhvāb ki jin ke dāman meñ tahzīb-e-nau ke ḳhāke the

aane vaale kal kī ḳhushiyāñ guzre hue kal ke saa.e the

un ḳhvāboñ ke anjām pe ye āñkheñ sharminda hotī haiñ

vo ḳhvāb jo saare TuuT chuke un kī mayyat pe rotī haiñ

ye duniyā kitnī zālim hai ḳhvāboñ kā saudā kartī hai

ma.asūm diloñ kī ārzūeñ sikkoñ meñ taulā kartī hai

is duniyā ke har goshe meñ ġhurbat hai bhuuk hai ḳhvārī hai

kuchh ke hisse meñ sarmāya kuchh kā hissa nādārī hai

aisī duniyā meñ ḳhvāb mire zinda kaise rah sakte the

shīshe kī tarah vo nāzuk the ye Thes kahāñ sah sakte the

lekin maiñ abhī māyūs nahīñ har ġham ko ḳhushī meñ Dhālūñgā

vo ḳhvāb jo mujh se ruuTh ga.e un ḳhvāboñ ko samjhā lūñgā

maiñ phir ubhrūñgā jiine ke kuchh aur na.e armān liye

ye daur badalne ke da.ave apne haq kā elaan liye

maiñ bastī bastī ghar ghar meñ na.aroñ kī aag bichchhā dūñgā

mazlūm jafā-kash logoñ kī soī taqdīr jagā dūñgā

maiñ giit likhūñgā fasloñ par bāġhoñ khetoñ khaliyānoñ par

mill mazdūroñ kī Tolī par gaañv ke mast kisānoñ par

ab jab tak bhī maiñ zinda huuñ har dukh har sadma jhelūñgā

maiñ tūfānoñ se uljhūñgā maiñ har ḳhatre se khelūñgā

aur mar bhī gayā to dhartī ke har zarre meñ baT jā.ūñgā

maiñ har ik ke ġham kā sāthī sab kā shā.ir kahlā.ūñgā

wo KHwab ki jin mein jalti thi shamen tere ruKHsaron ki

wo KHwab ki jin mein banti thi taswir mere shahkaron ki

wo KHwab ki jin ki taqat se duniya ka rup badalna tha

wo KHwab ki jin ki ThanDak mein shoalon par mujh ko chalna tha

wo KHwab ki jin ke daman mein tahzib-e-nau ke KHake the

aane wale kal ki KHushiyan guzre hue kal ke sae the

un KHwabon ke anjam pe ye aankhen sharminda hoti hain

wo KHwab jo sare TuT chuke un ki mayyat pe roti hain

ye duniya kitni zalim hai KHwabon ka sauda karti hai

masum dilon ki aarzuen sikkon mein taula karti hai

is duniya ke har goshe mein ghurbat hai bhuk hai KHwari hai

kuchh ke hisse mein sarmaya kuchh ka hissa nadari hai

aisi duniya mein KHwab mere zinda kaise rah sakte the

shishe ki tarah wo nazuk the ye Thes kahan sah sakte the

lekin main abhi mayus nahin har gham ko KHushi mein Dhaalunga

wo KHwab jo mujh se ruTh gae un KHwabon ko samjha lunga

main phir ubhrunga jine ke kuchh aur nae arman liye

ye daur badalne ke dawe apne haq ka elan liye

main basti basti ghar ghar mein naron ki aag bichchha dunga

mazlum jafa-kash logon ki soi taqdir jaga dunga

main git likhunga faslon par baghon kheton khaliyanon par

mill mazduron ki Toli par ganw ke mast kisanon par

ab jab tak bhi main zinda hun har dukh har sadma jhelunga

main tufanon se uljhunga main har KHatre se khelunga

aur mar bhi gaya to dharti ke har zarre mein baT jaunga

main har ek ke gham ka sathi sab ka shair kahlaunga