ki tum ye sach mano

sach maano maiñ ne tumheñ dekhā nahīñ

ek martaba yuuñ huā thā

ki māyūs lamhoñ meñ tumheñ āvāz de kar apnī taraf mutavajjah karne kī sa'ī kar hī rahā thā

ki āhista se āvāz aa.ī

vo nahīñ hai yahāñ pahāḌoñ kī duniyā meñ apne safar par jā chukā hai

ab vo yahāñ nahīñ hai

sirf apnī parchhā.īñ kī āsūdgī ko chhoḌe

kisī anjān jazīre kī khoj meñ nikal chukā hai

phir vo kahīñ se zaḳhmī ho kar tumhāre paas aa.egā

aur apnī āvāz yuuñ buland karegā

kyā tum ne mujhe pukārā

tum kahnā hargiz nahīñ

mirī ‘ibādat kisī bhī khoj ke liye nahīñ hai

maiñ mahsūs kartā huuñ aksar auqāt

ki māyūs lamhe pazhmurda se ho kar

ḳhūbsūrat zabān sunñā chāhte haiñ

lekin mirī ‘ibādat kisī bhī khoj ke liye nahīñ hai

chand saal pahle maiñ us bulandī par pahuñchā thā

vahāñ sirf jangal the ādamiyoñ kā qaht thā

maiñ akelā thā aur vo kisī ḳhvāb-nāk bastī meñ ḳhud ko mahsūs karne gayā thā

dar-asl vo apne kiye par pashemān hai

aur maiñ āzād huuñ

ki tum ye sach maano maiñ ne tumheñ hargiz dekhā nahīñ

sach mano main ne tumhein dekha nahin

ek martaba yun hua tha

ki mayus lamhon mein tumhein aawaz de kar apni taraf mutawajjah karne ki sa'i kar hi raha tha

ki aahista se aawaz aai

wo nahin hai yahan pahaDon ki duniya mein apne safar par ja chuka hai

ab wo yahan nahin hai

sirf apni parchhain ki aasudgi ko chhoDe

kisi anjaan jazire ki khoj mein nikal chuka hai

phir wo kahin se zaKHmi ho kar tumhaare pas aaega

aur apni aawaz yun buland karega

kya tum ne mujhe pukara

tum kahna hargiz nahin

meri ‘ibaadat kisi bhi khoj ke liye nahin hai

main mahsus karta hun aksar auqat

ki mayus lamhe pazhmurda se ho kar

KHubsurat zaban sunna chahte hain

lekin meri ‘ibaadat kisi bhi khoj ke liye nahin hai

chand sal pahle main us bulandi par pahuncha tha

wahan sirf jangal the aadamiyon ka qaht tha

main akela tha aur wo kisi KHwab-nak basti mein KHud ko mahsus karne gaya tha

dar-asl wo apne kiye par pasheman hai

aur main aazad hun

ki tum ye sach mano main ne tumhein hargiz dekha nahin