kinara

tū ne achchhā hī kiyā mujh se kināra kar ke

maiñ tujhe yās-o-aziyyat ke sivā kyā detā

yuuñ to apnā bhī kabhī saath nahīñ de paayā

phir kisī aur kā maiñ saath bhalā kyā detā

tū ne duniyā ke usūloñ pe hī chalnā chāhā

maiñ zamāne ke ishāroñ pe nahīñ chal saktā

merī to jang hai dariyāoñ ke dhārāoñ se

Dar ke maujoñ se kināroñ pe nahīñ chal saktā

merī mahbūb mirī raah meñ kāñTe haiñ bahut

tere pairoñ ke liye koī sitam Thiik na thā

chaar pal saath jo guzre haiñ vahī kaafī hai

umr-bhar saath bitāne kā bharam Thiik na thā

tū ne achchhā hī kiyā raah badal lī apnī

maiñ tire qurb ke qābil to kabhī thā hī nahīñ

ham-safar terā maiñ aise meñ kahāñ tak bantā

maiñ ne apnā to kabhī saath nibhāyā hī nahīñ

tū ne achchhā hī kiyā mujh se kināra kar ke

tu ne achchha hi kiya mujh se kinara kar ke

main tujhe yas-o-aziyyat ke siwa kya deta

yun to apna bhi kabhi sath nahin de paya

phir kisi aur ka main sath bhala kya deta

tu ne duniya ke usulon pe hi chalna chaha

main zamane ke ishaaron pe nahin chal sakta

meri to jang hai dariyaon ke dhaaraon se

Dar ke maujon se kinaron pe nahin chal sakta

meri mahbub meri rah mein kanTe hain bahut

tere pairon ke liye koi sitam Thik na tha

chaar pal sath jo guzre hain wahi kafi hai

umr-bhar sath bitane ka bharam Thik na tha

tu ne achchha hi kiya rah badal li apni

main tere qurb ke qabil to kabhi tha hi nahin

ham-safar tera main aise mein kahan tak banta

main ne apna to kabhi sath nibhaya hi nahin

tu ne achchha hi kiya mujh se kinara kar ke