kirnon ki shahzadi

nīl-gagan ke sāgar meñ ye chāñd kī kashtī Dol rahī hai

jaise ek sunahrī titlī uḌne ko par taul rahī hai

log ye kahte haiñ kashtī meñ chāñd kī buḌhiyā hotī hai

rātoñ ko jaagā kartī hai aur din bhar vo sotī hai

lekin maiñ ne ye bhī sunā hai chāñd meñ ik ābādī hai

is kashtī ko khene vaalī kirnoñ kī shahzādī hai

ye shahzādī añdhiyāre kā raaj miTāne aatī hai

raat ke dar tak ujiyāre kā diip jalāne aatī hai

ye shahzādī sub.h ko nazroñ se ojhal ho jaatī hai

aur kisī gumnām jazīre meñ jā kar so jaatī hai

maiñ bistar par chup leTā huuñ raat jahāñ se bhaag rahī hai

kirnoñ kī shahzādī lekin sub.h kī fikr meñ jaag rahī hai

nil-gagan ke sagar mein ye chand ki kashti Dol rahi hai

jaise ek sunahri titli uDne ko par taul rahi hai

log ye kahte hain kashti mein chand ki buDhiya hoti hai

raaton ko jaga karti hai aur din bhar wo soti hai

lekin main ne ye bhi suna hai chand mein ek aabaadi hai

is kashti ko khene wali kirnon ki shahzadi hai

ye shahzadi andhiyare ka raj miTane aati hai

raat ke dar tak ujiyare ka dip jalane aati hai

ye shahzadi subh ko nazron se ojhal ho jati hai

aur kisi gumnam jazire mein ja kar so jati hai

main bistar par chup leTa hun raat jahan se bhag rahi hai

kirnon ki shahzadi lekin subh ki fikr mein jag rahi hai