kitab

kitāb kholiye paḌhiye kuchh āgahī ke liye

ki aaj ilm zarūrī hai zindagī ke liye

isī safīr ne aalam ko āgahī dī hai

isī charāġh ne duniyā ko raushnī dī hai

isī chaman meñ ka.ī phuul muskurāte haiñ

nadī to kyā hai samundar bhī Duub jaate haiñ

azal se is kī mohabbat se āshnā.ī hai

ye bhīgtī huī palkeñ nichoḌ laa.ī hai

isī kī oT meñ chhup-chhup ke hiir rotī hai

isī kī chhāñv meñ pāgal priit sotī hai

is anjuman meñ halākū ke hoñT silte haiñ

adab se baiThe hue bādshāh milte haiñ

is aa.ine ko tamaddun kī aabrū kah lo

yā ek shahr jise shahr-e-ārzū kah lo

ye saare ramz ke parde uThāne lagtī hai

ye dil kī baat har ik ko sunāne lagtī hai

isī kī aañkh se āñkheñ dikhā.ī detī haiñ

isī maqām se rāheñ dikhā.ī detī haiñ

lipaT ke ūñghne lagtī hai māh-pāroñ se

ye jā ke Thokareñ khātī hai shīr-ḳhvāroñ se

ḳhudā kī zaat ne shohrat isī se paa.ī hai

ye is zamīñ pe payambar ke saath aa.ī hai

kitab kholiye paDhiye kuchh aagahi ke liye

ki aaj ilm zaruri hai zindagi ke liye

isi safir ne aalam ko aagahi di hai

isi charagh ne duniya ko raushni di hai

isi chaman mein kai phul muskuraate hain

nadi to kya hai samundar bhi Dub jate hain

azal se is ki mohabbat se aashnai hai

ye bhigti hui palken nichoD lai hai

isi ki oT mein chhup-chhup ke hir roti hai

isi ki chhanw mein pagal prit soti hai

is anjuman mein halaku ke honT silte hain

adab se baiThe hue baadshah milte hain

is aaine ko tamaddun ki aabru kah lo

ya ek shahr jise shahr-e-arzu kah lo

ye sare ramz ke parde uThane lagti hai

ye dil ki baat har ek ko sunane lagti hai

isi ki aankh se aankhen dikhai deti hain

isi maqam se rahen dikhai deti hain

lipaT ke unghne lagti hai mah-paron se

ye ja ke Thokaren khati hai shir-KHwaron se

KHuda ki zat ne shohrat isi se pai hai

ye is zamin pe payambar ke sath aai hai