kitni yaaden purani chali aati hain

raat hote hī jab niile ākāsh meñ

dil kī tanhā.iyāñ jagmagā jaatī haiñ

biite lamhoñ kā jaadū jagāte hue

panchhiyoñ kī qatāreñ guzar jaatī haiñ

kitnī yādeñ purānī chalī ātīñ haiñ

bārishoñ kī hoñ chāhe vo sargoshiyāñ

yā hoñ vīrān rāhoñ kī ḳhāmoshiyāñ

yā ghane jangaloñ kī hasīñ rāhateñ

duur mujh se bahut mujh ko le jaatī haiñ

kitnī yādeñ purānī chalī aatī haiñ

ḳhvāb aise bhī dil meñ chale aate haiñ

saare ehsās jab yuuñ chhiTak jaate haiñ

jaise sūkhe se tālāb kī sat.h par

aaḌī tirchhī darāḌeñ ubhar aatī haiñ

kitnī yādeñ purānī chalī aatī haiñ

duur mujh se khaḌī ajnabī ajnabī

rūThī rūThī zarā jis ghaḌī zindagī

jab bhī tanhā.ī kā pūchhtī hai sabab

tan meñ sāñsoñ se sāñseñ ulajh jaatī haiñ

kitnī yādeñ purānī chalī aatī haiñ

raat hote hi jab nile aakash mein

dil ki tanhaiyan jagmaga jati hain

bite lamhon ka jadu jagate hue

panchhiyon ki qataren guzar jati hain

kitni yaaden purani chali aatin hain

barishon ki hon chahe wo sargoshiyan

ya hon viran rahon ki KHamoshiyan

ya ghane jangalon ki hasin rahaten

dur mujh se bahut mujh ko le jati hain

kitni yaaden purani chali aati hain

KHwab aise bhi dil mein chale aate hain

sare ehsas jab yun chhiTak jate hain

jaise sukhe se talab ki sath par

aaDi tirchhi daraDen ubhar aati hain

kitni yaaden purani chali aati hain

dur mujh se khaDi ajnabi ajnabi

ruThi ruThi zara jis ghaDi zindagi

jab bhi tanhai ka puchhti hai sabab

tan mein sanson se sansen ulajh jati hain

kitni yaaden purani chali aati hain