koi nam hi rakh len

ḳhvāboñ ke jazīre se kisī roz nikal kar

ta.abīr ke phaile hue sahrā meñ bhī ghūmeñ

kab tak yuuñ hī

motī kī tarah siip meñ ham qaid raheñge

ye dā.era-dar-dā.era baḌhtī huī uljhan

ye zehn pe har lamha savālāt ke pahre

sochoñ kā ye sailāb kahāñ jā ke rukegā

kis moḌ pe jazboñ kā ye tūfān thamegā

ḳhushbū kā faqat phuul hī maskan to nahīñ hai

ḳhushbū to havāoñ ke bhī hamrāh chalī hai

phir kyoñ ye takalluf ye tasanño ye banāvaT

milte haiñ to phir mil ke lipaT kyoñ nahīñ jaate

dar-parda kabhī sher kabhī giit kī lai par

ma.asūm vafāoñ kā ye iz.hār hai kaisā

ye pyaar hai kaisā

hoñToñ meñ dabī baat kā ab zā.iqa chakh leñ

be-nām se rishte kā koī naam hī rakh leñ

KHwabon ke jazire se kisi roz nikal kar

tabir ke phaile hue sahra mein bhi ghumen

kab tak yun hi

moti ki tarah sip mein hum qaid rahenge

ye daera-dar-daera baDhti hui uljhan

ye zehn pe har lamha sawalat ke pahre

sochon ka ye sailab kahan ja ke rukega

kis moD pe jazbon ka ye tufan thamega

KHushbu ka faqat phul hi maskan to nahin hai

KHushbu to hawaon ke bhi hamrah chali hai

phir kyon ye takalluf ye tasanno ye banawaT

milte hain to phir mil ke lipaT kyon nahin jate

dar-parda kabhi sher kabhi git ki lai par

masum wafaon ka ye izhaar hai kaisa

ye pyar hai kaisa

honTon mein dabi baat ka ab zaiqa chakh len

be-nam se rishte ka koi nam hi rakh len