kya KHuda koi nahin

log gumān kar baiThe haiñ ke ḳhudā koī nahīñ

har taraf nizām badal rahā hai

parindoñ ke giit ab shor kī

shakl iḳhtiyār kar chuke haiñ

pahāḌ guzishta do dahā.īyoñ se ġham-zada haiñ

qahqahoñ ne ġhamoñ se dostī kar lī hai

ab parinde shahr kā ruḳh nahīñ karte

insān insānoñ se ḳhaufzada hai

bahtī naddiyāñ ab vīrān āvāzeñ nikāltī haiñ

samundar kisī baḌe hamle kī tayyārī kar rahā hai

zamīn logoñ se tang aa kar apne madār meñ

ghūmnā band kar chukī hai

pahāḌ ab zamīn kī giraft se āzādī chāhte haiñ

log apnī marzī kar rahe haiñ

tavā.ifoñ ke paañv chūmte aur biivī ko

ḳhushiyāñ dene se katrāte haiñ

din-bhar hasīnoñ ke jismoñ ke ḳhadd-o-ḳhāl māpte

shaam ko inhīñ āñkhoñ se sapne dekhte

aur sochte haiñ ke ḳhudā koī nahīñ

vīrān saḌkoñ par reñgtī ḳhāmoshī na jaane

kitne insān nigal chukī hai

mohabbat ke haath ab be-shumār logoñ ke

ḳhuun se rang chuke haiñ

har chiiz ḳhaufzada hai

magar ḳhudā abhī bhī kisī gahrī

soch meñ mubtalā hai

log guman kar baiThe hain ke KHuda koi nahin

har taraf nizam badal raha hai

parindon ke git ab shor ki

shakl iKHtiyar kar chuke hain

pahaD guzishta do dahaiyon se gham-zada hain

qahqahon ne ghamon se dosti kar li hai

ab parinde shahr ka ruKH nahin karte

insan insanon se KHaufzada hai

bahti naddiyan ab viran aawazen nikalti hain

samundar kisi baDe hamle ki tayyari kar raha hai

zamin logon se tang aa kar apne madar mein

ghumna band kar chuki hai

pahaD ab zamin ki giraft se aazadi chahte hain

log apni marzi kar rahe hain

tawaifon ke panw chumte aur biwi ko

KHushiyan dene se katraate hain

din-bhar hasinon ke jismon ke KHadd-o-KHal mapte

sham ko inhin aankhon se sapne dekhte

aur sochte hain ke KHuda koi nahin

viran saDkon par rengti KHamoshi na jaane

kitne insan nigal chuki hai

mohabbat ke hath ab be-shumar logon ke

KHun se rang chuke hain

har chiz KHaufzada hai

magar KHuda abhi bhi kisi gahri

soch mein mubtala hai