kya wo main hi tha

kyā vo maiñ hī thā

jis ne

itnī ġhazleñ nazmeñ itne nāTak

aur na-jāne kyā kuchh likhā

merī āñkheñ

mīloñ duur falak par uḌtī huī patangeñ dekh ke

un meñ farq batā saktī thiiñ

badminton ke court ke āḳhirī kone se

palak jhapakne meñ aage net par aatā thā

aur palaT kar pal meñ

vāpas dūsre kone tak jaatā thā

kyā vo maiñ hī thā

ghar kī tīsrī manzil par

din meñ das baar pahuñchnā

kosoñ paidal chalnā

dauḌ lagānā

din kī thakan kā

raat kī bedārī meñ muḳhil na honā

do do roz musalsal

chauñsaTh ḳhāne sāmne rakkhe

mohre aage pīchhe karnā

sab ma.amūl kī bāteñ

khāne se pahle ye kabhī na sochā

kyā khānā hai

baad meñ kabhī ḳhayāl na aaya

kyā aur kitnā khāyā

ganne ko dāñtoñ se chhīl ke khā saktā thā

kachchā saTTā pakke chane chabā saktā thā

shart lagā kar āñgan meñ

jāmun ke peḌ kī sab se ūñchī shāḳh ko chhū aatā thā

kyā vo maiñ hī thā

aur vo ishq ke qisse

ḳhair

un kā zikr to jaane hī do

un ke bayāñ kī taab nahīñ hai

yādoñ ke daftar meñ goyā

ab ye baab nahīñ hai

kya wo main hi tha

jis ne

itni ghazlen nazmen itne naTak

aur na-jaane kya kuchh likha

meri aankhen

milon dur falak par uDti hui patangen dekh ke

un mein farq bata sakti thin

badminton ke court ke aaKHiri kone se

palak jhapakne mein aage net par aata tha

aur palaT kar pal mein

wapas dusre kone tak jata tha

kya wo main hi tha

ghar ki tisri manzil par

din mein das bar pahunchna

koson paidal chalna

dauD lagana

din ki thakan ka

raat ki bedari mein muKHil na hona

do do roz musalsal

chaunsaTh KHane samne rakkhe

mohre aage pichhe karna

sab mamul ki baaten

khane se pahle ye kabhi na socha

kya khana hai

baad mein kabhi KHayal na aaya

kya aur kitna khaya

ganne ko danton se chhil ke kha sakta tha

kachcha saTTa pakke chane chaba sakta tha

shart laga kar aangan mein

jamun ke peD ki sab se unchi shaKH ko chhu aata tha

kya wo main hi tha

aur wo ishq ke qisse

KHair

un ka zikr to jaane hi do

un ke bayan ki tab nahin hai

yaadon ke daftar mein goya

ab ye bab nahin hai