la shuur

maiñ so gayā

to zindagī alāmatoñ kī khoj meñ nikal ga.ī

purāne zāviyoñ kī dhuul

jism par male hue

bahut nirāsh saiñkaḌoñ baras ke giit ghaaT ghaaT phailte safed pāniyoñ ke biich gholtī

chaltī ga.ī

safed pāniyoñ ke naam

purāne zāviyoñ kī dhuul nafrateñ aur pattharoñ kī Dheryāñ

udaas paañv thak ga.e

na jādūoñ kī bhiiḌ thī na log the jo dhaat ke bane hue hisār meñ ghire

hue bikhar ga.e

nishān kāñpte nishān kho ga.e

vo gaañv aur gaañv kī nadī pe ek pul ki jaise aa.ine pe sañgtare ke surḳh qaash

bārhā jo dhuup meñ chamak uThī

vo bārishoñ se dhul ga.ī

kabhī safed pyāliyoñ ke gird jo bañdhe hue siyāh taar der tak sadā.eñ de ke kaT ga.e

to mausamoñ ke saa.e bhī guzar ga.e

zamīn apne āñsuoñ se bhīgtī chalī ga.ī

havā chalī to duur duur dhund se aTe hue gharoñ kī mōn-bastiyoñ meñ fāsloñ ke tez

sañkh baj uThe

jahāz koī aa rahā hai pāniyoñ ko chīrtā vo aa gayā

magar yahāñ kī bastiyoñ meñ kaun hai jo aas kī shikhā liye sapāT sard riit par khaḌā rahe

koī nahīñ koī nahīñ

to kyuuñ na ab bujhī huī dishāoñ ko sameT leñ

to kyuuñ na aur so raheñ

main so gaya

to zindagi alamaton ki khoj mein nikal gai

purane zawiyon ki dhul

jism par male hue

bahut nirash sainkaDon baras ke git ghaT ghaT phailte safed paniyon ke bich gholti

chalti gai

safed paniyon ke nam

purane zawiyon ki dhul nafraten aur pattharon ki Dheryan

udas panw thak gae

na jaduon ki bhiD thi na log the jo dhat ke bane hue hisar mein ghire

hue bikhar gae

nishan kanpte nishan kho gae

wo ganw aur ganw ki nadi pe ek pul ki jaise aaine pe sangtare ke surKH qash

barha jo dhup mein chamak uThi

wo barishon se dhul gai

kabhi safed pyaliyon ke gird jo bandhe hue siyah tar der tak sadaen de ke kaT gae

to mausamon ke sae bhi guzar gae

zamin apne aansuon se bhigti chali gai

hawa chali to dur dur dhund se aTe hue gharon ki moon-bastiyon mein faslon ke tez

sankh baj uThe

jahaz koi aa raha hai paniyon ko chirta wo aa gaya

magar yahan ki bastiyon mein kaun hai jo aas ki shikha liye sapaT sard rit par khaDa rahe

koi nahin koi nahin

to kyun na ab bujhi hui dishaon ko sameT len

to kyun na aur so rahen