la-yahdil-qaumazzalimin

ham ḳharāboñ meñ rahte hue aise shahkār haiñ

jo ḳhudāoñ ko sajda kareñ

aur un ke ta'āqub meñ chalte hue

bhūke pyāsoñ ko luqma-e-ajal kar chaleñ

ham musībat-zada log haiñ

jo payambar kī bātoñ ko bhūle hue

ik musībat-zada shaḳhs ko apnā rahbar kaheñ

ham vo bhaTke hue log haiñ

jo ḳhudā ke payambar ko maslūb kar ke

usī ko ḳhudā kah ga.e

ham zamīñ-zād kaisī zamīñ par Tapak aa.eñ haiñ

ek aisī zamīñ ki jahāñ

zulm karnā hī dastūr hai

ham vahāñ haiñ jahāñ tere munkir ḳhudā.ī kā dā'vā kareñ

tere sachche kahāñ jaa.eñ kis ko pukāreñ batā

ai ḳhudā-e-azal munsif-e-do-jahāñ

do-jahānoñ ke ḳhāliq ḳhudā

is zamīñ ko banāne se pahle

tujhe sochnā chāhiye thā

hum KHarabon mein rahte hue aise shahkar hain

jo KHudaon ko sajda karen

aur un ke ta'aqub mein chalte hue

bhuke pyason ko luqma-e-ajal kar chalen

hum musibat-zada log hain

jo payambar ki baaton ko bhule hue

ek musibat-zada shaKHs ko apna rahbar kahen

hum wo bhaTke hue log hain

jo KHuda ke payambar ko maslub kar ke

usi ko KHuda kah gae

hum zamin-zad kaisi zamin par Tapak aaen hain

ek aisi zamin ki jahan

zulm karna hi dastur hai

hum wahan hain jahan tere munkir KHudai ka da'wa karen

tere sachche kahan jaen kis ko pukaren bata

ai KHuda-e-azal munsif-e-do-jahan

do-jahanon ke KHaliq KHuda

is zamin ko banane se pahle

tujhe sochna chahiye tha