lab-e-baam

tumhīñ to aa.ī ho saj-dhaj ke jalva-gar hone

tumhīñ khaḌī ho lab-e-bām dekhtā huuñ maiñ

kuchh aur der zarā tum vahīñ khaḌī rahnā

nashāt-e-dīd kā hangām dekhtā huuñ maiñ

tumhārā husn hai goyā nikhār phūloñ kā

har ik adā pe tumhārī nisār jān-o-dil

vafā ke naam pe marnā bhī mujh ko aatā hai

sahārā de do mujhe tum ki duur hai manzil

tumheñ ye kaise maiñ samjhā.ūñ ai sabā-andāz

ki maiñ tumhārī adāoñ pe jaan detā huuñ

pahuñch hī jā.ūñgā āḳhir tumhāre āñchal tak

qasam tumhārī tumheñ maiñ zabān detā huuñ

ye jāntā huuñ ki haiñ ḳhaar rahguzāroñ meñ

zamāna aayā hai ham-fitrat-e-sitam ban kar

har ik sitam ko maiñ sah lūñgā kaash tum kuchh der

vahīñ khaḌī raho guldasta-e-karam ban kar

tumhārī āñkhoñ meñ ho intizār kā kājal

to mere sāmne rāhoñ ke pech-o-ḳham kyā haiñ

tumhāre lutf kī sham.eñ agar farozāñ hoñ

to tīrgī-e-sitam sarsar-e-alam kyā haiñ

firāq-o-ġham ke añdheroñ meñ laḌkhaḌāte hue

tumhāre paas maiñ bālā-e-bām ā.uñgā

banā ke nazm-e-kuhan ko ġhubār-e-rāhguzar

liye hue maiñ na.ī sub.h-o-shām ā.uñgā

tumhin to aai ho saj-dhaj ke jalwa-gar hone

tumhin khaDi ho lab-e-baam dekhta hun main

kuchh aur der zara tum wahin khaDi rahna

nashat-e-did ka hangam dekhta hun main

tumhaara husn hai goya nikhaar phulon ka

har ek ada pe tumhaari nisar jaan-o-dil

wafa ke nam pe marna bhi mujh ko aata hai

sahaara de do mujhe tum ki dur hai manzil

tumhein ye kaise main samjhaun ai saba-andaz

ki main tumhaari adaon pe jaan deta hun

pahunch hi jaunga aaKHir tumhaare aanchal tak

qasam tumhaari tumhein main zaban deta hun

ye jaanta hun ki hain KHar rahguzaron mein

zamana aaya hai ham-fitrat-e-sitam ban kar

har ek sitam ko main sah lunga kash tum kuchh der

wahin khaDi raho guldasta-e-karam ban kar

tumhaari aankhon mein ho intizar ka kajal

to mere samne rahon ke pech-o-KHam kya hain

tumhaare lutf ki shamen agar farozan hon

to tirgi-e-sitam sarsar-e-alam kya hain

firaq-o-gham ke andheron mein laDkhaDate hue

tumhaare pas main baala-e-baam aaunga

bana ke nazm-e-kuhan ko ghubar-e-rahguzar

liye hue main nai subh-o-sham aaunga