lahu bolta hai 4

maiñ apne ḳhuuñ ko javāb detā huuñ

nichlā hissa mire badan kā

jo zaat bhī kā.enāt bhī thā

mirā hī apnā aTuuT hissa thā maiñ hī thā merā apnā maiñ thā

agar maiñ haivāñ kī pahlī manzil se

irtiqā ke hazār zīnoñ pe chaḌhtā chaḌhtā

vajūd kī ek ek manzil phalāñg kar

ahd-e-mansabī ke kisī bhī ā.inda kal kī jānib ravāñ-davāñ huuñ

to mujh ko haivāñ se buġhz kyā hai

ki irtiqā kī ye pahlī manzil

mirī rag-o-pai meñ

jism ke resha-hā-e-mū meñ

rachī huī hai

basī huī hai

ye merā kal hai jo mere hāzir kā aaj bhī hai

mire guzishta se aaj paivast merā maazī hī

mere tan kā vo nichlā hissa hai

jis ko jhuTlā ke

jis se Dar kar

jise kahīñ kaañT chhāñT karne ke ba.ad

rūd-e-nafī ke tārīk chaah meñ pheñk kar

maiñ aadhe adhūre tan ko liye hue kaise jī sakūñgā

main apne KHun ko jawab deta hun

nichla hissa mere badan ka

jo zat bhi kaenat bhi tha

mera hi apna aTuT hissa tha main hi tha mera apna main tha

agar main haiwan ki pahli manzil se

irtiqa ke hazar zinon pe chaDhta chaDhta

wajud ki ek ek manzil phalang kar

ahd-e-mansabi ke kisi bhi aainda kal ki jaanib rawan-dawan hun

to mujh ko haiwan se bughz kya hai

ki irtiqa ki ye pahli manzil

meri rag-o-pai mein

jism ke resha-ha-e-mu mein

rachi hui hai

basi hui hai

ye mera kal hai jo mere hazir ka aaj bhi hai

mere guzishta se aaj paiwast mera mazi hi

mere tan ka wo nichla hissa hai

jis ko jhuTla ke

jis se Dar kar

jise kahin kanT chhanT karne ke baad

rud-e-nafi ke tarik chah mein phenk kar

main aadhe adhure tan ko liye hue kaise ji sakunga