lahu KHud hi pukar uTThega

qatl ho aur sar-e-bāzār na kyoñ hairat ho

aur phir qatl se inkār na kyoñ hairat ho

da.avā-e-adl bhī qātil kī taraf-dārī bhī

jab ho ye adl kā me.aar na kyoñ hairat ho

aaj āzād hai qānūn se mujrim yaksar

jurm-e-nā-karda giraftār na kyoñ hairat ho

kyoñ ta.ajjub ho ki qātil kā nigahbān hai adl

aur mazlūm sar-e-dār na kyoñ hairat ho

ham ne insāf jo chāhā to sazā paa.ī hai

hai ye insāf to jiine kī fazā kyā hogī

ab faqat adl nahīñ ziist ke bhī tālib haiñ

zindagī chāhne vāloñ kī sazā kyā hogī

qaid se tab.a-e-junūñ-sāz kahāñ ruktī hai

jabr se jur.at-e-parvāz kahāñ ruktī hai

arsa-e-zīst ho zindāñ ho ki maqtal ho kahīñ

zulm se ziist kī āvāz kahāñ ruktī hai

zulm hogā to zabāñ chup na rahegī hargiz

na.ara hargiz na dabegā sar-e-dār uTThegā

vaqt pahchānegā zālim ko bhī mazlūm ko bhī

kaun qātil hai lahū ḳhud hī pukār uTThegā

qatl ho aur sar-e-bazar na kyon hairat ho

aur phir qatl se inkar na kyon hairat ho

dawa-e-adl bhi qatil ki taraf-dari bhi

jab ho ye adl ka mear na kyon hairat ho

aaj aazad hai qanun se mujrim yaksar

jurm-e-na-karda giraftar na kyon hairat ho

kyon tajjub ho ki qatil ka nigahban hai adl

aur mazlum sar-e-dar na kyon hairat ho

hum ne insaf jo chaha to saza pai hai

hai ye insaf to jine ki faza kya hogi

ab faqat adl nahin zist ke bhi talib hain

zindagi chahne walon ki saza kya hogi

qaid se taba-e-junun-saz kahan rukti hai

jabr se jurat-e-parwaz kahan rukti hai

arsa-e-zist ho zindan ho ki maqtal ho kahin

zulm se zist ki aawaz kahan rukti hai

zulm hoga to zaban chup na rahegi hargiz

nara hargiz na dabega sar-e-dar uTThega

waqt pahchanega zalim ko bhi mazlum ko bhi

kaun qatil hai lahu KHud hi pukar uTThega