lakaDhaari

safīna-sāz thā vo lakḌiyāñ maiñ kaaT laatī thī

so bas ik din kahā us ne lakaḌhārī

anokhe ik safīne kī hī ab taḳhlīq baaqī hai

mujhe darkār hai jis ke liye nādīda jangal kī

khanaktī surma.ī lakḌī

agar tū DhūñD laa.e to

banā saktā huuñ maiñ nādir safīna ik

maiñ us kī baat sunte hī yakāyak chauñk uTThī phir

nazar bhar kar use dekhā zarā sā muskurā.ī aur

kisī nādīda jangal kī taraf chalne lagī paiham

na-jāne kitne mīloñ kī masāfat par khaḌī huuñ par

koī nādīda jangal hī nahīñ miltā

khanaktī surma.ī lakḌī

kahāñ se haath aa.egī

magar ab sochtī huuñ ki safīna-sāz ko mere kisī sarsabz jangal kī khanaktī surma.ī lakḌī yaqīnan mil ga.ī hogī

safina-saz tha wo lakDiyan main kaT lati thi

so bas ek din kaha us ne lakaDhaari

anokhe ek safine ki hi ab taKHliq baqi hai

mujhe darkar hai jis ke liye nadida jangal ki

khanakti surmai lakDi

agar tu DhunD lae to

bana sakta hun main nadir safina ek

main us ki baat sunte hi yakayak chaunk uTThi phir

nazar bhar kar use dekha zara sa muskurai aur

kisi nadida jangal ki taraf chalne lagi paiham

na-jaane kitne milon ki masafat par khaDi hun par

koi nadida jangal hi nahin milta

khanakti surmai lakDi

kahan se hath aaegi

magar ab sochti hun ki safina-saz ko mere kisi sarsabz jangal ki khanakti surmai lakDi yaqinan mil gai hogi