lamhe ki baat

ye us lamhe kī baat hai

jab aañkh jhapakne se Dar lagtā

aur is Dar meñ lipTī huī

adhūrā hone kī ḳhvāhish

Tahalte Tahalte

jhuuT kī us dīvār ke paas pahuñch jaatī

jis kī buniyādoñ meñ

nauzā.ida sach dafn the

tab maiñ ḳhāmoshī ke chatiyal maidān meñ

tan ke khaḌā ho jaatā

aur anjānī manziloñ se aatī huī havā

lafzoñ ke pairāhan se ek ek kar ke

sab rang utārnā shurūa kar detī

aur tum

mujhe apnī taraf dekhtā dekh kar

ronā shurūa kar detī aur

mujhe aañkh khulne se Dar lagne lagtā

aur is Dar meñ lipTī huī

mukammal hone kī ḳhvāhish

tumhārī āvāz meñ shāmil ho jaatī

jo sargoshiyāñ ban kar

mere bāloñ meñ ungliyāñ phertī

aur maiñ tumheñ chup karāte karāte

dīvār kī buniyād meñ utar jaatā

ye us lamhe ki baat hai

jab aankh jhapakne se Dar lagta

aur is Dar mein lipTi hui

adhura hone ki KHwahish

Tahalte Tahalte

jhuT ki us diwar ke pas pahunch jati

jis ki buniyaadon mein

nauzaida sach dafn the

tab main KHamoshi ke chatiyal maidan mein

tan ke khaDa ho jata

aur anjaani manzilon se aati hui hawa

lafzon ke pairahan se ek ek kar ke

sab rang utarna shurua kar deti

aur tum

mujhe apni taraf dekhta dekh kar

rona shurua kar deti aur

mujhe aankh khulne se Dar lagne lagta

aur is Dar mein lipTi hui

mukammal hone ki KHwahish

tumhaari aawaz mein shamil ho jati

jo sargoshiyan ban kar

mere baalon mein ungliyan pherti

aur main tumhein chup karaate karaate

diwar ki buniyaad mein utar jata