lamhon ka zaKHm

ye havā.eñ ye fazā.eñ ye sulagte ehsās

kitne ġham baḌh ke añdheroñ kī tarah phail ga.e

kitne chehroñ ke diye bujh ga.e jalte jalte

ahd-e-māzī kī alamnāk ghaḌī phir tirī yaad kī tasvīr uThā laa.ī hai

dil ke darvāze pe dastak dene

dard ke haath kī baḌhtī huī parchhā.ī hai

aur maiñ soch rahā huuñ baiThā

terī zulfoñ kī mahak

tere badan kī ḳhushbū

ab kisī aur ke bistar pe numāyāñ hoñge

tire aariz kī damak

terī nazar kā jaadū

ab kisī aur kī taskīn kā sāmāñ hoñge

tū kisī aur kī dahlīz pe jā pahuñchī hai

maiñ kahīñ aur tirī yaad liye phirtā huuñ

tū kisī aur kī bāhoñ meñ simaT aa.ī hai

maiñ kahīñ aur tire pyaar kā dam bhartā huuñ

maiñ ne chāhā thā ki maiñ tere liye giit likhūñ

maiñ ne chāhā thā ki tū mere liye raah take

maiñ ne chāhā thā ki maiñ tere liye ḳhvāb bunūñ

ye bhī chāhā thā ki tū ḳhvāb kī ta.abīr bane

tū mirī ruuh ke jazbāt se Takrā na sakī

mujh ko Thukrā diyā hālāt se Takrā na sakī

zindagī vaqt kī zulmāt se Takrā na sakī

aur mirī raat tirī raat se Takrā na sakī

jabki maiñ aaj tirā koī nahīñ

phir tirī yaad mire saath ulajhtī kyoñ hai

jab tirā mujh se ta'alluq hī nahīñ

terī parchhā.īñ mire dil meñ sulagtī kyoñ hai

ye hawaen ye fazaen ye sulagte ehsas

kitne gham baDh ke andheron ki tarah phail gae

kitne chehron ke diye bujh gae jalte jalte

ahd-e-mazi ki alamnak ghaDi phir teri yaad ki taswir uTha lai hai

dil ke darwaze pe dastak dene

dard ke hath ki baDhti hui parchhai hai

aur main soch raha hun baiTha

teri zulfon ki mahak

tere badan ki KHushbu

ab kisi aur ke bistar pe numayan honge

tere aariz ki damak

teri nazar ka jadu

ab kisi aur ki taskin ka saman honge

tu kisi aur ki dahliz pe ja pahunchi hai

main kahin aur teri yaad liye phirta hun

tu kisi aur ki bahon mein simaT aai hai

main kahin aur tere pyar ka dam bharta hun

main ne chaha tha ki main tere liye git likhun

main ne chaha tha ki tu mere liye rah take

main ne chaha tha ki main tere liye KHwab bunun

ye bhi chaha tha ki tu KHwab ki tabir bane

tu meri ruh ke jazbaat se Takra na saki

mujh ko Thukra diya haalat se Takra na saki

zindagi waqt ki zulmat se Takra na saki

aur meri raat teri raat se Takra na saki

jabki main aaj tera koi nahin

phir teri yaad mere sath ulajhti kyon hai

jab tera mujh se ta'alluq hi nahin

teri parchhain mere dil mein sulagti kyon hai