lamhon ke asrar

shaam kā pahlā taara

dil ke ufuq par jis kī jot se

qaus-e-quzah se utrī thī

aur is quzah ne

saarī dil kī duniyā chamkā.ī thī

ziist kā pahlā sāvan thā vo

jis se jīvan-sāgar meñ

ik lahar uThī thī

aur is lahar ne saarī hastī

jal-thal kī thī

baaġh kī pahlī titlī thī vo

man-āñgan ke sūne-pan meñ

jis kī ik parchhā.īñ paḌī thī

aur jis parchhā.īñ ko chhūne kī

ḳhvāhish meñ

dasht-e-tamannā meñ jā nikle the ham

dasht-e-tamannā jis meñ har-sū

gahrā sannāTā thā

sannāTā bhī aisā jis ko koh-e-nidā se

har lamha āvāz aatī thī

jaane vālo! yaad rahe is raah nikalne vaale

lauT ke aa nahīñ sakte

lekin jin ko rañgoñ kī mahkār bulā.e

vo roke se ruk nahīñ sakte

jin ke jazbe sachche hoñ

vo aag pe kab chalne se Darte haiñ

ham bhī apnā maan liye

rāhoñ meñ ghultī jaan liye

chalte aa.e, bas chalte aa.e

chāñd kī pahlī raat thī vo jab

ham ko ye ehsās huā thā

ham to jīvan haar chuke haiñ

aur bahār kā vo ik lamha

jis ko ham apnā samjhe the

siine meñ ab kabhī na bujhne vaalī

aag utaar ke

ruḳhsat maañg rahā thā

aur vo ḳhushbū jis ko pā kar

ham ne ye sochā thā ki ham ko

jīvan ab tajne bhī dukh de

vaqt hamāre siine meñ ab

chāhe jitne zaḳhm utāre

ham pe zamāna jitne chāhe

vaar kare ab

sab hañs kar sah jā.eñge ham

bhed muqaddar ke kyā kahiye

kab vo kisī par khul sakte haiñ

honī to ho kar rahtī hai

kab vo bhalā Tal saktī hai

ḳhair jo honā thā so huā vo

ab to sab kuchh biit gayā hai

lekin phir bhī hone kā dukh

kam to nahīñ hai

aur is dukh kā bojh uThā.e

dard bharā ye jīvan apnā

un rāhoñ kī samt ravāñ hai

ant meñ jin ke aa jaatā hai

āḳhirī moḌ na hone kā

pahlā taara pahlā sā din

pahlī titlī aur vo pahlī chāñd kī raat

sab kuchh pal meñ biit gayā hai

aur ab āḳhirī moḌ se pahle

biite ḳhvāboñ kī galiyoñ meñ

apnī bikhrī zaat ke reze

lamha lamha chuntā huuñ

aane vaale vaqt kī chaap ko suntā huuñ

aur sochtā huuñ

kyā vo sab kuchh jis se

merī zaat kā rishta thā

vo sab kuchh pal meñ biit gayā hai

kyā vo sab kuchh jis se maiñ

ab vābasta huuñ

yūñhī pal meñ biit rahā hai

sham ka pahla tara

dil ke ufuq par jis ki jot se

qaus-e-quzah se utri thi

aur is quzah ne

sari dil ki duniya chamkai thi

zist ka pahla sawan tha wo

jis se jiwan-sagar mein

ek lahar uThi thi

aur is lahar ne sari hasti

jal-thal ki thi

bagh ki pahli titli thi wo

man-angan ke sune-pan mein

jis ki ek parchhain paDi thi

aur jis parchhain ko chhune ki

KHwahish mein

dasht-e-tamanna mein ja nikle the hum

dasht-e-tamanna jis mein har-su

gahra sannaTa tha

sannaTa bhi aisa jis ko koh-e-nida se

har lamha aawaz aati thi

jaane walo! yaad rahe is rah nikalne wale

lauT ke aa nahin sakte

lekin jin ko rangon ki mahkar bulae

wo roke se ruk nahin sakte

jin ke jazbe sachche hon

wo aag pe kab chalne se Darte hain

hum bhi apna man liye

rahon mein ghulti jaan liye

chalte aae, bas chalte aae

chand ki pahli raat thi wo jab

hum ko ye ehsas hua tha

hum to jiwan haar chuke hain

aur bahaar ka wo ek lamha

jis ko hum apna samjhe the

sine mein ab kabhi na bujhne wali

aag utar ke

ruKHsat mang raha tha

aur wo KHushbu jis ko pa kar

hum ne ye socha tha ki hum ko

jiwan ab tajne bhi dukh de

waqt hamare sine mein ab

chahe jitne zaKHm utare

hum pe zamana jitne chahe

war kare ab

sab hans kar sah jaenge hum

bhed muqaddar ke kya kahiye

kab wo kisi par khul sakte hain

honi to ho kar rahti hai

kab wo bhala Tal sakti hai

KHair jo hona tha so hua wo

ab to sab kuchh bit gaya hai

lekin phir bhi hone ka dukh

kam to nahin hai

aur is dukh ka bojh uThae

dard bhara ye jiwan apna

un rahon ki samt rawan hai

ant mein jin ke aa jata hai

aaKHiri moD na hone ka

pahla tara pahla sa din

pahli titli aur wo pahli chand ki raat

sab kuchh pal mein bit gaya hai

aur ab aaKHiri moD se pahle

bite KHwabon ki galiyon mein

apni bikhri zat ke reze

lamha lamha chunta hun

aane wale waqt ki chap ko sunta hun

aur sochta hun

kya wo sab kuchh jis se

meri zat ka rishta tha

wo sab kuchh pal mein bit gaya hai

kya wo sab kuchh jis se main

ab wabasta hun

yunhi pal mein bit raha hai