last call

abhī kuchh baat karnī hai abhī tum phone mat rakhnā

mujhe ye jānñā hai hai ab tumhārā haal kaisā hai

na.e logo meñ ik rishta purānā yaad aatā hai

mujhe batlāo tum ne aaj kaise kapḌe pahne haiñ

dupaTTe se tumhāre ab bhī kyā dhāge nikalte haiñ

kyā ab bhī chūḌiyāñ hāthoñ kī mushkil se utartī haiñ

kyā ab bhī chaltī ho to pāyaleñ āvāz kartī haiñ

tumhāre haath par jalne kā vo ik daaġh kaisā hai

kyā ab bhī vo kalā.ī par tumhārī chāñd jaisā hai

kyā ab bhī purse meñ tum phuul kī pattī chhupātī ho

kyā ab bhī titliyoñ ko dekh kar tum muskurātī ho

kyā ab bhī kuchh sharārat karke tum sharmā sī jaatī ho

kyā ab bhī hañstī ho to haath se chehra chhupātī ho

kyā tum ko ab bhī koī chheḌ de to ruuTh jaatī ho

kyā tum ab bhī kisī ko pyaar se qasmeñ khilātī ho

abhī kuchh baat karnī hai abhī tum phone mat rakhnā

mujhe apnā bhī kuchh qissa abhī tum ko sunānā hai

badan aur ruuh pe aa.ī huī silvaT dikhānā hai

mirī shah-e-rag pe har dam hijr kī talvār laTkī hai

merī dhaḌkan bhī ab rukne kī tayyārī meñ rahtī hai

mire gamle meñ rakkhe phuul tum ko yaad karte haiñ

tumhārī yaad kī ḳhushbū se ye raste mahakte haiñ

magar chhoḌo mujhe mā'lūm hai tum aa na pāogī

na.e logoñ meñ apnā ik nayā rishta banāogī

maiñ tum ko bhuul jā.ūñ ye bahut mushkil sā lagtā hai

mujhe tum bhuul jaao ye tumhāre haq meñ achchhā hai

mujhe is se ziyāda aur tum se kuchh nahīñ kahnā

mirā number miTā do tum mujhe ab phone mat karnā

abhi kuchh baat karni hai abhi tum phone mat rakhna

mujhe ye jaanna hai hai ab tumhaara haal kaisa hai

nae logo mein ek rishta purana yaad aata hai

mujhe batlao tum ne aaj kaise kapDe pahne hain

dupaTTe se tumhaare ab bhi kya dhage nikalte hain

kya ab bhi chuDiyan hathon ki mushkil se utarti hain

kya ab bhi chalti ho to payalen aawaz karti hain

tumhaare hath par jalne ka wo ek dagh kaisa hai

kya ab bhi wo kalai par tumhaari chand jaisa hai

kya ab bhi purse mein tum phul ki patti chhupati ho

kya ab bhi titliyon ko dekh kar tum muskuraati ho

kya ab bhi kuchh shararat karke tum sharma si jati ho

kya ab bhi hansti ho to hath se chehra chhupati ho

kya tum ko ab bhi koi chheD de to ruTh jati ho

kya tum ab bhi kisi ko pyar se qasmen khilati ho

abhi kuchh baat karni hai abhi tum phone mat rakhna

mujhe apna bhi kuchh qissa abhi tum ko sunana hai

badan aur ruh pe aai hui silwaT dikhana hai

meri shah-e-rag pe har dam hijr ki talwar laTki hai

meri dhaDkan bhi ab rukne ki tayyari mein rahti hai

mere gamle mein rakkhe phul tum ko yaad karte hain

tumhaari yaad ki KHushbu se ye raste mahakte hain

magar chhoDo mujhe ma'lum hai tum aa na paogi

nae logon mein apna ek naya rishta banaogi

main tum ko bhul jaun ye bahut mushkil sa lagta hai

mujhe tum bhul jao ye tumhaare haq mein achchha hai

mujhe is se ziyaada aur tum se kuchh nahin kahna

mera number miTa do tum mujhe ab phone mat karna