lauT aa

dhīre dhīre yaḳh-basta kashmīrī sard havā.eñ

safed barfīlī chaTTānoñ se Takrā ke

apne vajūd ko ghāTī meñ mudġham kartī

shor machātī

choTī pe munaqqash mere bangle se lipaT jātīñ

shaffāf barf-posh ho ga.ī thī rāste kī har lakīr

aise meñ vo dekhne aayā thā barfīlā kashmīr

tavīl masāfat tai karne ke baa'd

us ne sun rakhā thā bahut kuchh

kashmīr kī dilkash bahāroñ ke baare

kashmīr ke dil-fareb nazāroñ ke baare

kashmīr ke za.afrān-zāroñ ke baare

kashmīr ke jharnoñ ābshāroñ ke baare

kashmīr ke lazīz rasīle phaloñ ke baare

magar afsos

ki vo laakh koshish ke bāvajūd bhī

lutf-andoz na ho sakā

vo chaah kar bhī bangle ke darvāze tak na aa sakā

masdūd rāstoñ ke sabab

us ke tamām ḳhvāb sarāb hue

us kī talab tishna rah ga.ī

chhoḌ gayā mere naam bahut se paiġhām-e-shauq

sar-phirī havāoñ ke haath

vo chalā gayā apnā saaya barf pe sabt karke

merī putliyoñ meñ sapnoñ kā mahlūl ghol ke

march ḳhatm ho rahā hai

april dastak de rahā hai

us zālim se koī kah de rāstoñ kī lakīr saaf hone lagī hai

barf pighalne lagī hai

lauT aa

dhire dhire yaKH-basta kashmiri sard hawaen

safed barfili chaTTanon se Takra ke

apne wajud ko ghaTi mein mudgham karti

shor machati

choTi pe munaqqash mere bangle se lipaT jatin

shaffaf barf-posh ho gai thi raste ki har lakir

aise mein wo dekhne aaya tha barfila kashmir

tawil masafat tai karne ke ba'd

us ne sun rakha tha bahut kuchh

kashmir ki dilkash bahaaron ke bare

kashmir ke dil-fareb nazaron ke bare

kashmir ke zafran-zaron ke bare

kashmir ke jharnon aabshaaron ke bare

kashmir ke laziz rasile phalon ke bare

magar afsos

ki wo lakh koshish ke bawajud bhi

lutf-andoz na ho saka

wo chah kar bhi bangle ke darwaze tak na aa saka

masdud raston ke sabab

us ke tamam KHwab sarab hue

us ki talab tishna rah gai

chhoD gaya mere nam bahut se paigham-e-shauq

sar-phiri hawaon ke hath

wo chala gaya apna saya barf pe sabt karke

meri putliyon mein sapnon ka mahlul ghol ke

march KHatm ho raha hai

april dastak de raha hai

us zalim se koi kah de raston ki lakir saf hone lagi hai

barf pighalne lagi hai

lauT aa