lo gard aur kitaben

sulagte din haiñ

tavīl tanhā.iyāñ mire saath leTe leTe

fazā se āñkheñ laḌā rahī haiñ

mire darīche ke paas sunsān rahguzar hai

abhī abhī ek relā aayā thā gard kā jo lapeT kar le gayā hai tinkoñ ko saath apne

mirī kitāboñ meñ kuchh nahīñ hai

hurūf be-rūh bad-maza haiñ

hikāyateñ apne ḳhushk hoñToñ ko chāTtī haiñ

tamām ash.ār-e-tishnagī ke lahū meñ palkeñ Dubo rahe haiñ

na rañg-o-naġhma na jām-o-mīnā na raqs-o-mastī

bagūle sab ko nigal rahe haiñ

tumhārī tasvīr DhūñDhtā huuñ

ki jis ke ThanDe ghanere saa.e meñ baiTh kar koī baat sochūñ

magar mire paas lū ke jhoñke haiñ gard hai aur kuchh kitābeñ

tumhārī tasvīr kho chukī hai

sulagte din hain

tawil tanhaiyan mere sath leTe leTe

faza se aankhen laDa rahi hain

mere dariche ke pas sunsan rahguzar hai

abhi abhi ek rela aaya tha gard ka jo lapeT kar le gaya hai tinkon ko sath apne

meri kitabon mein kuchh nahin hai

huruf be-ruh bad-maza hain

hikayaten apne KHushk honTon ko chaTti hain

tamam ashaar-e-tishnagi ke lahu mein palken Dubo rahe hain

na rang-o-naghma na jam-o-mina na raqs-o-masti

bagule sab ko nigal rahe hain

tumhaari taswir DhunDhta hun

ki jis ke ThanDe ghanere sae mein baiTh kar koi baat sochun

magar mere pas lu ke jhonke hain gard hai aur kuchh kitaben

tumhaari taswir kho chuki hai