lorka

zamīñ pe aḌtīs baar pattoñ kā rang badlā

rutoñ kī mohlat to muḳhtasar thī

magar tumhārī sadāoñ meñ jāgtī thiiñ sadiyāñ

guitar kā ek sur udāsī

kisī parinde kī chīḳh jaise

tumhāre gītoñ kā dūsrā sur nashāt-e-tāza

ki jaise chashme ubal rahe hoñ

tumhārī nazmeñ qadīm rāzoñ kī sarsarāhaT

ragoñ meñ jaise lahū kī halchal

lahū tumhārā lahū daraḳhtoñ ke paas miTTī meñ jazb

gahrī jaḌoñ meñ gum hai

magar havā.eñ nagar nagar shā.iroñ ke dāman meñ Dāltī haiñ

tumhāre gītoñ ke phuul

ḳhvāboñ kī Tahniyoñ kī safed kaliyāñ

vo sabz hairat

jo tum ne zaitūn ke daraḳhtoñ meñ ghulte dekhī

nazar nazar meñ chamak rahī hai

tumhārā barbat ye kah rahā hai

ki giit bandūq se baḌā hai

zamin pe aDtis bar patton ka rang badla

ruton ki mohlat to muKHtasar thi

magar tumhaari sadaon mein jagti thin sadiyan

guitar ka ek sur udasi

kisi parinde ki chiKH jaise

tumhaare giton ka dusra sur nashat-e-taza

ki jaise chashme ubal rahe hon

tumhaari nazmen qadim raazon ki sarsarahaT

ragon mein jaise lahu ki halchal

lahu tumhaara lahu daraKHton ke pas miTTi mein jazb

gahri jaDon mein gum hai

magar hawaen nagar nagar shairon ke daman mein Dalti hain

tumhaare giton ke phul

KHwabon ki Tahniyon ki safed kaliyan

wo sabz hairat

jo tum ne zaitun ke daraKHton mein ghulte dekhi

nazar nazar mein chamak rahi hai

tumhaara barbat ye kah raha hai

ki git banduq se baDa hai