lughat mahdud hai

udāsī baat kartī hai kisī anjān bolī meñ

sukūñ kā phuul dil ke shāḳhchoñ se toḌ letī hai

ye nīñdoñ ko uThā letī hai āñkhoñ ke kaToroñ se

kabhī khoī huī yādeñ kahīñ se khoj laatī hai

bahut sī an-kahī bāteñ kahīñ se gher laatī hai

hathelī par sajā laatī hai vo sūkhe hue patte

rachī hai jin ke reshoñ meñ koī bhūlī huī ḳhushbū

likhe haiñ jin pe guzre mausamoñ ke dil-nashīñ lamhe

purāne se purānā qufl pal meñ khol detī hai

udāsī jā utartī hai

badan ke un jazīroñ par

jinheñ vīrān rakhnā ho

udāsī TimTimātī hai

lahū ke un ilāqoñ meñ

jinheñ tārīk rakhnā ho

udasi baat karti hai kisi anjaan boli mein

sukun ka phul dil ke shaKHchon se toD leti hai

ye nindon ko uTha leti hai aankhon ke kaToron se

kabhi khoi hui yaaden kahin se khoj lati hai

bahut si an-kahi baaten kahin se gher lati hai

hatheli par saja lati hai wo sukhe hue patte

rachi hai jin ke reshon mein koi bhuli hui KHushbu

likhe hain jin pe guzre mausamon ke dil-nashin lamhe

purane se purana qufl pal mein khol deti hai

udasi ja utarti hai

badan ke un jaziron par

jinhen viran rakhna ho

udasi TimTimati hai

lahu ke un ilaqon mein

jinhen tarik rakhna ho