ma’siyat

maiñ ne chhuā to

vo duudh kīchaḌ ban ban ke phailā

‘iffat havā kī

sāñsoñ meñ ghul kar

gadle dhueñ kī sūrat meñ phailī

shīshe ke suthre ujle badan par

mere badan ne

kālak sī thopī

saare muqaddas hujroñ ke andar

rūheñ nahā kar haiñ sar-ba-sajda

ūñche manāre āvāz ban kar

merā ta'āqub karte rahe haiñ

saañp aur kazdum

baiThe hue haiñ

mere badan kī lazzat ko chakkheñ

mā'sūm āñkheñ

shānoñ ko mere sho'le ugalte

hairāñ hirāsāñ chup dekhtī haiñ

nūrānī parbat sabze kī shāleñ tan pe lapeTe

niile ufuq par Thahre hue haiñ

maiñ ne hī apnī is raushnī ko sho'loñ meñ Dhālā

aur apne saare ḳhirman jalā kar

sho'loñ kī dhun par raqsāñ huuñ tanhā

main ne chhua to

wo dudh kichaD ban ban ke phaila

‘iffat hawa ki

sanson mein ghul kar

gadle dhuen ki surat mein phaili

shishe ke suthre ujle badan par

mere badan ne

kalak si thopi

sare muqaddas hujron ke andar

ruhen naha kar hain sar-ba-sajda

unche manare aawaz ban kar

mera ta'aqub karte rahe hain

sanp aur kazdum

baiThe hue hain

mere badan ki lazzat ko chakkhen

ma'sum aankhen

shanon ko mere sho'le ugalte

hairan hirasan chup dekhti hain

nurani parbat sabze ki shaalen tan pe lapeTe

nile ufuq par Thahre hue hain

main ne hi apni is raushni ko sho'lon mein Dhaala

aur apne sare KHirman jala kar

sho'lon ki dhun par raqsan hun tanha