madar-e-hind ka KHitab

hindū bhī mujhe pyāre muslim bhī mujhe pyāre

mere liye donoñ haiñ āñkhoñ ke mirī taare

is des ke baasī haiñ is ḳhaak se paidā haiñ

aapas ke ye jhagḌe phir kyoñ in meñ huvaidā haiñ

hai dil se duā merī masrūr raheñ donoñ

dukh-dard se duniyā ke ye duur raheñ donoñ

kuchh shak nahīñ donoñ haiñ TukḌe ye mire dil ke

hāsil ho sukūñ mujh ko donoñ jo raheñ mil ke

hindū bhī phale phūle muslim bhī phale phūle

haañ haañ kī magar ḳhidmat ye bhūle na vo bhūle

mandir meñ bajeñ ghanTe masjid meñ azāneñ hoñ

in bātoñ pe laḌ-laḌ kar barbād na jāneñ hoñ

donoñ ko yahīñ marnā donoñ ko yahīñ jiinā

kyoñ bair rahe in meñ kyoñ in meñ rahe kiina

parnām bhī jaarī ho taslīm rahe qaa.em

qur.ān kī vedoñ kī ta.alīm rahe qaa.em

hindī kā bhī charchā ho urdu bhī phale-phūle

jhūle meñ taraqqī ke har ek zabāñ jhūle

nāshād na ho koī haañ shaad raheñ donoñ

āzād raheñ donoñ āzād raheñ donoñ

hindu bhi mujhe pyare muslim bhi mujhe pyare

mere liye donon hain aankhon ke meri tare

is des ke basi hain is KHak se paida hain

aapas ke ye jhagDe phir kyon in mein huwaida hain

hai dil se dua meri masrur rahen donon

dukh-dard se duniya ke ye dur rahen donon

kuchh shak nahin donon hain TukDe ye mere dil ke

hasil ho sukun mujh ko donon jo rahen mil ke

hindu bhi phale phule muslim bhi phale phule

han han ki magar KHidmat ye bhule na wo bhule

mandir mein bajen ghanTe masjid mein azanen hon

in baaton pe laD-laD kar barbaad na jaanen hon

donon ko yahin marna donon ko yahin jina

kyon bair rahe in mein kyon in mein rahe kina

parnam bhi jari ho taslim rahe qaem

quran ki wedon ki talim rahe qaem

hindi ka bhi charcha ho urdu bhi phale-phule

jhule mein taraqqi ke har ek zaban jhule

nashad na ho koi han shad rahen donon

aazad rahen donon aazad rahen donon