madar-e-hind

mādar-e-hind zamāne meñ tū ābād rahe

ham balā se hoñ giraftār tū ābād rahe

ham pe sau āfateñ nāzil hoñ masā.ib aa.eñ

tū magar ḳhush rahe ḳhurram rahe dil-shād rahe

terī ḳhidmat ke liye jab se kamar-basta haiñ

kis ko parvāh ki ābād yā barbād rahe

kis qadar ham pe jafā-gar ne jafā.eñ toḌīñ

taḳhta-e-mashq-e-sitam maurid-e-be-dād rahe

ham vafā ke haiñ vo bande ki kabhī aah na kī

dil ko roke hue thāme hue fariyād rahe

ham ne pīchhe na haTāyā kabhī maidāñ se qadam

teġh khīñche hue go sāmne jallād rahe

mulk-o-millat kī taraf-dārī se muñh kab moḌā

garche āmāda sitam par sitam-ījād rahe

shauq-e-parvāz na āzād-ḳhayāloñ kā gayā

daam Daale hue har-chand ki sayyād rahe

ḳhuun se kar ga.e sairāb chaman ko 'sābir'

kyuuñ na bhārat ko shahīdoñ kī sadā yaad rahe

madar-e-hind zamane mein tu aabaad rahe

hum bala se hon giraftar tu aabaad rahe

hum pe sau aafaten nazil hon masaib aaen

tu magar KHush rahe KHurram rahe dil-shad rahe

teri KHidmat ke liye jab se kamar-basta hain

kis ko parwah ki aabaad ya barbaad rahe

kis qadar hum pe jafa-gar ne jafaen toDin

taKHta-e-mashq-e-sitam maurid-e-be-dad rahe

hum wafa ke hain wo bande ki kabhi aah na ki

dil ko roke hue thame hue fariyaad rahe

hum ne pichhe na haTaya kabhi maidan se qadam

tegh khinche hue go samne jallad rahe

mulk-o-millat ki taraf-dari se munh kab moDa

garche aamada sitam par sitam-ijad rahe

shauq-e-parwaz na aazad-KHayalon ka gaya

dam Dale hue har-chand ki sayyaad rahe

KHun se kar gae sairab chaman ko 'sabir'

kyun na bhaarat ko shahidon ki sada yaad rahe