mah-o-sal

isī ravish pe hai qaa.im mizāj-e-dīda-o-dil

lahū meñ ab bhī taḌaptī haiñ bijliyāñ ki nahīñ

zamīñ pe ab bhī utartā hai āsmāñ ki nahīñ?

kisī ke jaib-o-garebāñ kī āzmā.ish meñ

kabhī ḳhud apnī qabā kā ḳhayāl aatā hai

zarā sā vasvasa-e-māh-o-sāl aatā hai?

kabhī ye baat bhī sochī ki muntazir āñkheñ

ġhubār-e-rāhguzar meñ ujaḌ ga.ī hoñgī

nazar se TuuT chuke hoñge ḳhvāb ke raste

vo māhtāb sī nīndeñ bichhaḌ ga.ī hoñgī

niyāz-e-ḳhvājgī o shān-e-sarvarī kyā hai

shi.ār-e-mushfiqī o tarz-e-dilbarī kyā hai

ye be-ruḳhī ye adā-e-sitam bhī pūchheñge

hamārī umr ke ho lo to ham bhī pūchheñge

isi rawish pe hai qaim mizaj-e-dida-o-dil

lahu mein ab bhi taDapti hain bijliyan ki nahin

zamin pe ab bhi utarta hai aasman ki nahin?

kisi ke jaib-o-gareban ki aazmaish mein

kabhi KHud apni qaba ka KHayal aata hai

zara sa waswasa-e-mah-o-sal aata hai?

kabhi ye baat bhi sochi ki muntazir aankhen

ghubar-e-rahguzar mein ujaD gai hongi

nazar se TuT chuke honge KHwab ke raste

wo mahtab si ninden bichhaD gai hongi

niyaz-e-KHwajgi o shan-e-sarwari kya hai

shiar-e-mushfiqi o tarz-e-dilbari kya hai

ye be-ruKHi ye ada-e-sitam bhi puchhenge

hamari umr ke ho lo to hum bhi puchhenge