mah-ru

tū darīchoñ se aatī huī raushnī

māh-rū

terī nazmeñ savālāt kartī huiiñ

rang bhartī huī

terī āvāz merī samā'at meñ ras gholtī

jaise barbat koī god meñ rakh ke fitrat meñ khoyā huā

giit gaate hue

aur bhaTke hue un parindoñ ko rasta dikhāte hue

shaam ke baa'd ḳhemoñ meñ jaltā diyā

tū haqīqat koī

DhūñDne meñ jise ik zamāna lage

terā ehsās āñkhoñ meñ ḳhvāboñ kā jhurmuT

jinheñ dekh kar ek murda badan saañs lene lage

tū samundar hai

jis ke liye saare bhaTke hue dariyā apne kināroñ se bāhar tirī justujū meñ ravāñ

ek hairat-kada

terā chehra vo chehra

jise dekh kar kitnī sadiyoñ se lipTe hue gard se aa.ine saaf hone lage

saaz bajne lage

vajd meñ qāfile

raah bhūle hue saare milne lageñ

jin ko tū mil gayā

ḳhud se milne lage

raqs karne lage

māh-rū

tu darichon se aati hui raushni

mah-ru

teri nazmen sawalat karti huin

rang bharti hui

teri aawaz meri sama'at mein ras gholti

jaise barbat koi god mein rakh ke fitrat mein khoya hua

git gate hue

aur bhaTke hue un parindon ko rasta dikhate hue

sham ke ba'd KHemon mein jalta diya

tu haqiqat koi

DhunDne mein jise ek zamana lage

tera ehsas aankhon mein KHwabon ka jhurmuT

jinhen dekh kar ek murda badan sans lene lage

tu samundar hai

jis ke liye sare bhaTke hue dariya apne kinaron se bahar teri justuju mein rawan

ek hairat-kada

tera chehra wo chehra

jise dekh kar kitni sadiyon se lipTe hue gard se aaine saf hone lage

saz bajne lage

wajd mein qafile

rah bhule hue sare milne lagen

jin ko tu mil gaya

KHud se milne lage

raqs karne lage

mah-ru