mahaul banane wale jumle

aadhā cigarette pī kar pheñk diyā maiñ ne

us ke hisse kā

jis ke ġham meñ suntā huuñ

duniyā ko maiñ ne chhoḌ diyā

aur maiñ ḳhāmoshī se baiThā soch rahā huuñ

ye duniyā bhī kaun sī duniyā meñ jiitī hai

duniyā chhoḌ dī maiñ ne

aur ḳhud mujh ko ye mā'lūm nahīñ hai

ye bhī sunñe meñ aayā hai

jab se us kī maut huī hai

gum-sum huuñ maiñ

duur ḳhalā meñ jaane kyā taktā rahtā huuñ

duur ḳhalā meñ taknā kyā achchhā jumla hai

mujh ko bhī achchhā lagtā hai

kahne vāloñ ko to aur ziyāda achchhā lagtā hogā

jhuuT hai sab kuchh

lekin kyoñ tardīd karūñ maiñ

yahī to vo jumle haiñ jo māhaul banā.e rakhte haiñ kuchh

varna sachchī baat to ye hai

koshish kar ke āñkhoñ ko nam rakhnā

shave baḌhā.e rakhnā

ye bhī ek tarah kā sukh hai

mujhe to us kī maut se baḌh kar

us ke ġham kī maut kā dukh hai

aadha cigarette pi kar phenk diya main ne

us ke hisse ka

jis ke gham mein sunta hun

duniya ko main ne chhoD diya

aur main KHamoshi se baiTha soch raha hun

ye duniya bhi kaun si duniya mein jiti hai

duniya chhoD di main ne

aur KHud mujh ko ye ma'lum nahin hai

ye bhi sunne mein aaya hai

jab se us ki maut hui hai

gum-sum hun main

dur KHala mein jaane kya takta rahta hun

dur KHala mein takna kya achchha jumla hai

mujh ko bhi achchha lagta hai

kahne walon ko to aur ziyaada achchha lagta hoga

jhuT hai sab kuchh

lekin kyon tardid karun main

yahi to wo jumle hain jo mahaul banae rakhte hain kuchh

warna sachchi baat to ye hai

koshish kar ke aankhon ko nam rakhna

shawe baDhae rakhna

ye bhi ek tarah ka sukh hai

mujhe to us ki maut se baDh kar

us ke gham ki maut ka dukh hai