man ki nasihat

ek chuhiyā ye bolī beTe se

tujh se āñkheñ mirī huiiñ raushan

ham yahāñ ke purāne sākin haiñ

ka.ī pushtoñ kā guzrā hai bachpan

vo jo is ghar kā hai baḌā dālān

us meñ rahte haiñ khāne ke bartan

paas ik Tokarī bhī rahtī hai

us meñ haiñ aalū gobhī aur baigan

ne.amateñ sau haiñ tere khāne ko

lekin ai nūr-e-chashm-o-jān-e-man

usī ghar ke hai ek kone meñ

taar kī jāliyoñ kā ek maskan

log use chūhe-dān kahte haiñ

hai ye chuhiyoñ kī qaum kā dushman

chāhe us meñ hoñ ne.amateñ lākhoñ

haiñ vo sab terī maut ke kāran

tere jitne buzurg guzre haiñ

hazm unheñ kar gayā yahī dushman

tū agar us ke paas jā pahuñchā

ho ga.ī terī jaañ ko uljhan

rahnā har vaqt chūhe-dāñ se duur

aur phirnā har ek samt magan

chūhe kā bachcha baaz rah na sakā

kuchh to lālach thā aur kuchh bachpan

raat ko us ke paas aa hī gayā

ek luqme kī thī jo us ko lagan

sar baḌhāte hī lag gayā khaTkā

phañs ga.ī chūhe-dān meñ gardan

ek chuhiya ye boli beTe se

tujh se aankhen meri huin raushan

hum yahan ke purane sakin hain

kai pushton ka guzra hai bachpan

wo jo is ghar ka hai baDa dalan

us mein rahte hain khane ke bartan

pas ek Tokari bhi rahti hai

us mein hain aalu gobhi aur baigan

neamaten sau hain tere khane ko

lekin ai nur-e-chashm-o-jaan-e-man

usi ghar ke hai ek kone mein

tar ki jaliyon ka ek maskan

log use chuhe-dan kahte hain

hai ye chuhiyon ki qaum ka dushman

chahe us mein hon neamaten lakhon

hain wo sab teri maut ke karan

tere jitne buzurg guzre hain

hazm unhen kar gaya yahi dushman

tu agar us ke pas ja pahuncha

ho gai teri jaan ko uljhan

rahna har waqt chuhe-dan se dur

aur phirna har ek samt magan

chuhe ka bachcha baz rah na saka

kuchh to lalach tha aur kuchh bachpan

raat ko us ke pas aa hi gaya

ek luqme ki thi jo us ko lagan

sar baDhate hi lag gaya khaTka

phans gai chuhe-dan mein gardan