man

sukūñ ke phuul har ik dil meñ maañ khilātī hai

vo ujḌe ghar ko bhī rashk-e-jināñ banātī hai

jahāñ kahīñ bhī vo rakhtī hai apne paak qadam

vahīñ se ḳhuld ko ik raah sīdhī jaatī hai

ḳhudā bhī us ko girātā hai qa.ar-e-pastī meñ

nazar se apnī jise pyārī maañ girātī hai

ḳhushī meñ maañ kī jo ThanDak hai us kā kyā kahnā

vo qahr-e-rab ko bhī ik aan meñ bujhātī hai

zabān khultī hai jaise hī nanhe bachche kī

baḌe hī chaah se kalima use paḌhātī hai

jo bachche raat meñ ho jaate haiñ kabhī bedār

unheñ vo niiñd kī chādar ma.an uḌhātī hai

vo parvarish hī nahīñ kartī apne bachchoñ kī

unheñ vo sāhib-e-kirdār bhī banātī hai

zarā bhī khultī hai khiḌkī jo maañ kī yādoñ kī

to dil meñ ḳhuld se sīdhe bahār aatī hai

agar ho chashm-e-tasavvur meñ maañ samā.ī huī

to jitnī duur ho utnī vo yaad aatī hai

mire vajūd meñ shāmil hai maañ kā bahr-e-karam

mirī hayāt kī kashtī vahī chalātī hai

jo maañ kī ḳhidmat-e-ālī meñ pesh hotā huuñ

to māmtā ke hasīñ farsh par biThātī hai

shafīq maañ kī maiñ ḳhidmat koī karūñ na karūñ

vo mere haq meñ duā.eñ kiye hī jaatī hai

qubūliyat meñ koī der bhī nahīñ lagtī

duā jo arsh pe 'maqsūd' maañ kī jaatī hai

sukun ke phul har ek dil mein man khilati hai

wo ujDe ghar ko bhi rashk-e-jinan banati hai

jahan kahin bhi wo rakhti hai apne pak qadam

wahin se KHuld ko ek rah sidhi jati hai

KHuda bhi us ko giraata hai qar-e-pasti mein

nazar se apni jise pyari man giraati hai

KHushi mein man ki jo ThanDak hai us ka kya kahna

wo qahr-e-rab ko bhi ek aan mein bujhati hai

zaban khulti hai jaise hi nanhe bachche ki

baDe hi chah se kalima use paDhati hai

jo bachche raat mein ho jate hain kabhi bedar

unhen wo nind ki chadar man uDhati hai

wo parwarish hi nahin karti apne bachchon ki

unhen wo sahib-e-kirdar bhi banati hai

zara bhi khulti hai khiDki jo man ki yaadon ki

to dil mein KHuld se sidhe bahaar aati hai

agar ho chashm-e-tasawwur mein man samai hui

to jitni dur ho utni wo yaad aati hai

mere wajud mein shamil hai man ka bahr-e-karam

meri hayat ki kashti wahi chalati hai

jo man ki KHidmat-e-ali mein pesh hota hun

to mamta ke hasin farsh par biThati hai

shafiq man ki main KHidmat koi karun na karun

wo mere haq mein duaen kiye hi jati hai

qubuliyat mein koi der bhi nahin lagti

dua jo arsh pe 'maqsud' man ki jati hai