margila aur tum aur main

koī phūloñ bharā jangal thā

bhārī ḳhushbuoñ vaalā

kisī vaadī meñ ThanDī sabz rangat gir rahī thī

dil bhī gahrā.ī meñ girtā thā

ghane pattoñ ke ghere-dār gahre sabz bādal the

jahāñ tanhā kiran ne ḳhud ko hī rasta banāyā

ḳhud hī us par saat rangā jism le kar chal paḌī

āñkhoñ pe utrī putliyoñ ke paar pahuñchī

to vahāñ maiñ dekh paayā tum ko aur ḳhud ko

hamārā rang dhānī thā

jamāl-e-rang naġhma-rez thā

ham sun rahe the

vo ajab rangoñ bharā sapnā thā

jis meñ chal rahe the ham

havā chaltī to mere dil se koī baat le letī

tumhāre dil meñ rakh detī

tumhārī aañkh se jo rang uḌtā

vo mirī āñkhoñ meñ aa jaatā

vo ik phūloñ bharā sapnā thā

jis meñ chal rahe the ham

magar ab dekhte haiñ

chaar jānib dhuup meñ jaltā zamāna hai

zamāne kī bahut be-rang saḌkeñ haiñ

ham un par bhāgte haiñ aur ḳhud ko mil nahīñ paate

na-jāne tum kahāñ gum ho

na-jāne maiñ kahāñ gum huuñ

koi phulon bhara jangal tha

bhaari KHushbuon wala

kisi wadi mein ThanDi sabz rangat gir rahi thi

dil bhi gahrai mein girta tha

ghane patton ke ghere-dar gahre sabz baadal the

jahan tanha kiran ne KHud ko hi rasta banaya

KHud hi us par sat ranga jism le kar chal paDi

aankhon pe utri putliyon ke par pahunchi

to wahan main dekh paya tum ko aur KHud ko

hamara rang dhani tha

jamal-e-rang naghma-rez tha

hum sun rahe the

wo ajab rangon bhara sapna tha

jis mein chal rahe the hum

hawa chalti to mere dil se koi baat le leti

tumhaare dil mein rakh deti

tumhaari aankh se jo rang uDta

wo meri aankhon mein aa jata

wo ek phulon bhara sapna tha

jis mein chal rahe the hum

magar ab dekhte hain

chaar jaanib dhup mein jalta zamana hai

zamane ki bahut be-rang saDken hain

hum un par bhagte hain aur KHud ko mil nahin pate

na-jaane tum kahan gum ho

na-jaane main kahan gum hun