mazarat

koī nazm kaise kaheñ ki ham

na charāġh haiñ

na misāl-e-harf-e-gulāb haiñ

na ḳhayāl haiñ

na kisī kī aañkh kā ḳhvāb haiñ

kisī gum-shuda sī vafāoñ kī

kisī shaam meñ

jo bichhaḌ ga.e

to bichhaḌne vāloñ kī yaad meñ

kahīñ ret haiñ

kahīñ ashk-e-ġham kā ġhubār haiñ

vo jo dasht

hijr kā hai kahīñ

isī dasht-e-shām judā.ī ke

ye jo daaġh haiñ

tirī yaad ke

tire ba.ad ke

koī nazm kaise kaheñ ki ham

na charāġh haiñ

na misāl-e-harf-e-gulāb haiñ

na ḳhayāl haiñ

na kisī kī aañkh kā ḳhvāb haiñ

ye jo shahr hai

to ye shahr bhī

saf-e-dushmanāñ se milā huā

ye jo log haiñ

to ye log bhī

kahāñ jānte haiñ ki kyā huā

koī nazm kaise kahīñ

ki ham

ye fazā hī aisī nahīñ rahī

jo charāġh koī jalā.eñ ham

to havā hī aisī

nahīñ rahī

tahī-e-fikr aise hue haiñ ham

tire ḳhāl-o-ḳhad kā bayāñ bhī ab

na hamāre dast-e-hunar meñ thā

na hamāre dast-e-hunar meñ hai

koi nazm kaise kahen ki hum

na charagh hain

na misal-e-harf-e-gulab hain

na KHayal hain

na kisi ki aankh ka KHwab hain

kisi gum-shuda si wafaon ki

kisi sham mein

jo bichhaD gae

to bichhaDne walon ki yaad mein

kahin ret hain

kahin ashk-e-gham ka ghubar hain

wo jo dasht

hijr ka hai kahin

isi dasht-e-sham judai ke

ye jo dagh hain

teri yaad ke

tere baad ke

koi nazm kaise kahen ki hum

na charagh hain

na misal-e-harf-e-gulab hain

na KHayal hain

na kisi ki aankh ka KHwab hain

ye jo shahr hai

to ye shahr bhi

saf-e-dushmanan se mila hua

ye jo log hain

to ye log bhi

kahan jaante hain ki kya hua

koi nazm kaise kahin

ki hum

ye faza hi aisi nahin rahi

jo charagh koi jalaen hum

to hawa hi aisi

nahin rahi

tahi-e-fikr aise hue hain hum

tere KHal-o-KHad ka bayan bhi ab

na hamare dast-e-hunar mein tha

na hamare dast-e-hunar mein hai