madh

(1)

kas tarah bayāñ ho tirā pairā-e-taqrīr

goyā sar-e-bātil pe chamakne lagī shamshīr

vo zor hai ik lafz idhar nutq se niklā

vaañ sīna-e-aġhyār meñ paivast hue tiir

garmī bhī hai ThanDak bhī ravānī bhī sakūñ bhī

tāsīr kā kyā kahiye hai tāsīr hī tāsīr

e.ajāz usī kā hai ki arbāb-e-sitam kī

ab tak koī anjām ko pahuñchī nahīñ tadbīr

atrāf-e-vatan meñ huā haq baat kā shohra

har ek jagah makr-o-riyā kī huī tash.hīr

raushan hue ummīd se ruḳh ahl-e-vafā ke

peshānī-e-ādā pe siyāhī huī tahrīr

(2)

hurriyat-e-ādam kī rah-e-saḳht ke rah-gīr

ḳhātir meñ nahīñ laate ḳhayāl-e-dam-e-ta.azīr

kuchh nañg nahīñ ranj-e-asīrī ki purānā

mardān-e-safā-kesh se hai rishtā-e-zanjīr

kab dabdaba-e-jabr se dabte haiñ ki jin ke

īmān o yaqīñ dil meñ kiye rahte haiñ tanvīr

ma.alūm hai un ko ki rihā hogī kasī din

zālim ke girāñ haath se mazlūm kī taqdīr

āḳhir ko sar-afrāz huā karte haiñ ahrār

āḳhir ko girā kartī hai har jaur kī ta.amīr

har daur meñ sar hote haiñ qasr-e-jam-o-dārā

har ahd meñ dīvār-e-sitam hotī hai tasḳhīr

har daur meñ mal.ūn shaqāvat hai 'shimar' kī

har ahd meñ mas.ūd hai qurbānī-e-shabbīr

(3)

kartā hai qalam apne lab o nutq kī tathīr

pahuñchī hai sar-e-haraf-e-duā ab mirī tahrīr

har kaam meñ barkat ho har ik qaul meñ quvvat

har gaam pe ho manzil-e-maqsūd qadam-gīr

har lahza tirā tāle-e-iqbāl sivā ho

har lahza madad-gār ho tadbīr kī taqdīr

har baat ho maqbūl, har ik bol ho baalā

kuchh aur bhī raunaq meñ baḌhe shola-e-taqrīr

har din ho tirā lutf-e-zabāñ aur ziyāda

allāh kare zor-e-bayāñ aur ziyāda

(1)

kas tarah bayan ho tera paira-e-taqrir

goya sar-e-baatil pe chamakne lagi shamshir

wo zor hai ek lafz idhar nutq se nikla

wan sina-e-aghyar mein paiwast hue tir

garmi bhi hai ThanDak bhi rawani bhi sakun bhi

tasir ka kya kahiye hai tasir hi tasir

eajaz usi ka hai ki arbab-e-sitam ki

ab tak koi anjam ko pahunchi nahin tadbir

atraf-e-watan mein hua haq baat ka shohra

har ek jagah makr-o-riya ki hui tashhir

raushan hue ummid se ruKH ahl-e-wafa ke

peshani-e-ada pe siyahi hui tahrir

(2)

hurriyat-e-adam ki rah-e-saKHt ke rah-gir

KHatir mein nahin late KHayal-e-dam-e-tazir

kuchh nang nahin ranj-e-asiri ki purana

mardan-e-safa-kesh se hai rishta-e-zanjir

kab dabdaba-e-jabr se dabte hain ki jin ke

iman o yaqin dil mein kiye rahte hain tanwir

malum hai un ko ki riha hogi kasi din

zalim ke giran hath se mazlum ki taqdir

aaKHir ko sar-afraaz hua karte hain ahrar

aaKHir ko gira karti hai har jaur ki tamir

har daur mein sar hote hain qasr-e-jam-o-dara

har ahd mein diwar-e-sitam hoti hai tasKHir

har daur mein malun shaqawat hai 'shimar' ki

har ahd mein masud hai qurbani-e-shabbir

(3)

karta hai qalam apne lab o nutq ki tathir

pahunchi hai sar-e-haraf-e-dua ab meri tahrir

har kaam mein barkat ho har ek qaul mein quwwat

har gam pe ho manzil-e-maqsud qadam-gir

har lahza tera tale-e-iqbaal siwa ho

har lahza madad-gar ho tadbir ki taqdir

har baat ho maqbul, har ek bol ho baala

kuchh aur bhi raunaq mein baDhe shola-e-taqrir

har din ho tera lutf-e-zaban aur ziyaada

allah kare zor-e-bayan aur ziyaada