magarmachh ne mujhe nigla hua hai

magarmachh ne mujhe niglā huā hai

ik janīn-e-nā-tavāñ huuñ

jis ghaḌī rakkhī ga.ī buniyād merī

us ghaḌī se

tīrgī ke peT meñ huuñ

ḳhuun kī tarsīl

āñval se ġhizā

jaarī hai

kachchī aañkh ke aage tanī

mauhūm sī jhillī haTā kar

dekhtā huuñ!

dekhtā huuñ

garm gahre les ke dariyā meñ

kachhuoñ, meñDakoñ

jal-kekḌoñ ke pārachoñ meñ

ojhaḌī ke khurdure reshoñ meñ

sālim huuñ

nabūd o buud ke tārīk andeshoñ meñ

bāhar kaun hai

jo zaat ke is ḳhema-e-ḳhākistarī ke

peT ke phūle hue

gadle ġhubāre par

azal se kaan rakh kar sun rahā hai

sar paTaḳhne

haath paañv mārne

karvaT badalne kī sadā!

paanī kā gahrā shor hai

indar bhī bāhar bhī

barahna jism se chimTe hue haiñ

kaa.ī ke reze

mujhe phir se janam dene kī ḳhātir

zachgī ke ik kalāve ne

ugalne ke kisī va.ade ne

sadiyoñ se

mujhe jakḌā huā hai

maañ

magarmachh ne mujhe niglā huā hai!!

magarmachh ne mujhe nigla hua hai

ek janin-e-na-tawan hun

jis ghaDi rakkhi gai buniyaad meri

us ghaDi se

tirgi ke peT mein hun

KHun ki tarsil

aanwal se ghiza

jari hai

kachchi aankh ke aage tani

mauhum si jhilli haTa kar

dekhta hun!

dekhta hun

garm gahre les ke dariya mein

kachhuon, meinDakon

jal-kekDon ke parachon mein

ojhaDi ke khurdure reshon mein

salim hun

nabud o bud ke tarik andeshon mein

bahar kaun hai

jo zat ke is KHema-e-KHakistari ke

peT ke phule hue

gadle ghubare par

azal se kan rakh kar sun raha hai

sar paTaKHne

hath panw marne

karwaT badalne ki sada!

pani ka gahra shor hai

indar bhi bahar bhi

barahna jism se chimTe hue hain

kai ke reze

mujhe phir se janam dene ki KHatir

zachgi ke ek kalawe ne

ugalne ke kisi wade ne

sadiyon se

mujhe jakDa hua hai

man

magarmachh ne mujhe nigla hua hai!!