maghwi

ek sub.h maiñ bedār huā to ḳhudā ġhā.eb thā

ye behad tashvīsh kī baat thī

mujhe us kī talāsh meñ nikalnā paḌā

bastī meñ us kā nishān nahīñ milā

maiñ ne ek khojī se rābta kiyā

us ne kharā dekh kar batāyā

ḳhudā ko burda-faroshoñ ne iġhvā kar liyā hai

maiñ ne police se rābta kiyā

thānedār ne ḳhudā kī report darj karne se inkār kar diyā

maiñ adālat meñ pesh huā

qaazī ne ḳhudā kā muqaddama sunñe se inkār kar diyā

maiñ ne darbār meñ hāzirī dī

hākim ne ḳhudā kā zikr sunñe se inkār kar diyā

chal chal kar maiñ rāsta bhuul gayā

bhaTakte bhaTakte ek begār camp jā pahuñchā

vahāñ rañg-birañgī Topiyoñ vaale iġhvā-kāroñ kī mahfil jamī thī

ḳhudā bhī maujūd thā

us ke pairoñ meñ beḌiyāñ paḌī thiiñ

lekin haath khule hue the

jin se vo

iġhvā-kāroñ ke mutālbe par

jannat ke bāġhoñ aur jahannum ke tandūroñ ke mālikāna huqūq kī filoñ par

be-takān dastaḳhat kiye jā rahā thā

ek subh main bedar hua to KHuda ghaeb tha

ye behad tashwish ki baat thi

mujhe us ki talash mein nikalna paDa

basti mein us ka nishan nahin mila

main ne ek khoji se rabta kiya

us ne khara dekh kar bataya

KHuda ko burda-faroshon ne ighwa kar liya hai

main ne police se rabta kiya

thanedar ne KHuda ki report darj karne se inkar kar diya

main adalat mein pesh hua

qazi ne KHuda ka muqaddama sunne se inkar kar diya

main ne darbar mein haziri di

hakim ne KHuda ka zikr sunne se inkar kar diya

chal chal kar main rasta bhul gaya

bhaTakte bhaTakte ek begar camp ja pahuncha

wahan rang-birangi Topiyon wale ighwa-karon ki mahfil jami thi

KHuda bhi maujud tha

us ke pairon mein beDiyan paDi thin

lekin hath khule hue the

jin se wo

ighwa-karon ke mutalbe par

jannat ke baghon aur jahannum ke tanduron ke malikana huquq ki filon par

be-takan dastaKHat kiye ja raha tha