mahmud darwesh ke liye KHat

mere pyāre sogvār

mujhe ma.alūm huā hai

ki tumhāre logoñ se zinda rahne kī jagah

aur haq chhīne jaane ke baa.is

tumhārā dil ḳhairiyat se nahīñ rahā

mujhe ma.alūm huā hai

ki tumhāre bahāduroñ ko dhuup se bachāne vaalī Topiyāñ

un ke ḳhuun se surḳh aur tumhārī sābir auratoñ ke chehre

ġham kī shiddat se siyāh ho chuke haiñ

mere bhaa.ī zaitūn ke daraḳhtoñ par lage phuul

aur tumhāre phūloñ jaise bachchoñ se umaDne vaalī

ḳhushbū bārūd aur dhuveñ kī bū meñ

badal chukī hai

aur mere dost

sunā hai tumhāre sar par haath rakhne vaale

ab unhīñ hāthoñ se tumhāre pairoñ ke nīche zamīn khīñch rahe haiñ

abhī is ḳhat ko likhte hue aisā lagā

jaise koī darvāze par hai

maiñ ne darvāza kholā

to bāhar duur tak kuchh na thā

na koī imārat na koī ghar

na koī mausam na koī din

na koī shaḳhs na koī saaya

na koī ġham na koī aañsū

sirf sunānā aur ḳhāmoshī

maiñ ne apne dil kā darvāza band kar liyā

aur vāpas aa gayā

yahāñ tamām log mom ke sipāhiyoñ

aur aañsū zahrīlī muskurāhaToñ meñ tabdīl ho ga.e haiñ

mahmūd darvesh

tumheñ tasallī dene aur tumhāre logoñ kī himāyat meñ kahne

ke liye mere paas sivā.e ek namnāk ḳhāmoshī ke

kuchh bhī nahīñ

yā kuchh log jo merī tarah

apnī mezoñ kī band darvāze ke sāmne baiThe

un ke ḳhud-ba-ḳhud khulne yā kisī aur na hone vaale mo.ajize ke muntazir haiñ

mere pyare sogwar

mujhe malum hua hai

ki tumhaare logon se zinda rahne ki jagah

aur haq chhine jaane ke bais

tumhaara dil KHairiyat se nahin raha

mujhe malum hua hai

ki tumhaare bahaduron ko dhup se bachane wali Topiyan

un ke KHun se surKH aur tumhaari sabir auraton ke chehre

gham ki shiddat se siyah ho chuke hain

mere bhai zaitun ke daraKHton par lage phul

aur tumhaare phulon jaise bachchon se umaDne wali

KHushbu barud aur dhuwen ki bu mein

badal chuki hai

aur mere dost

suna hai tumhaare sar par hath rakhne wale

ab unhin hathon se tumhaare pairon ke niche zamin khinch rahe hain

abhi is KHat ko likhte hue aisa laga

jaise koi darwaze par hai

main ne darwaza khola

to bahar dur tak kuchh na tha

na koi imarat na koi ghar

na koi mausam na koi din

na koi shaKHs na koi saya

na koi gham na koi aansu

sirf sunana aur KHamoshi

main ne apne dil ka darwaza band kar liya

aur wapas aa gaya

yahan tamam log mom ke sipahiyon

aur aansu zahrili muskurahaTon mein tabdil ho gae hain

mahmud darwesh

tumhein tasalli dene aur tumhaare logon ki himayat mein kahne

ke liye mere pas siwae ek namnak KHamoshi ke

kuchh bhi nahin

ya kuchh log jo meri tarah

apni mezon ki band darwaze ke samne baiThe

un ke KHud-ba-KHud khulne ya kisi aur na hone wale moajize ke muntazir hain