mahngi coffee ke cup mein khaulta hua din

aur maaoñ kī chhātiyoñ se chhīnī

huī javān zindagī kisī safed

parcham par girte haiñ aur ek baḌā

dhabba ban jaatā hai

laundriyoñ meñ dhule ayyām

hamāre siine meñ gāḌhī ga.ī

kīloñ par sukhā.e jaate haiñ

kisī mulk kā naqsha dhabbe se

baḌā nahīñ hotā ki use dhone ke

liye aisā haiz kā ḳhuun sarf kar diyā jaa.e

jo is liye jaarī ho gayā ki

hamal Thaharne ke aivānoñ meñ

koī sarkārī harkāra nahīñ thā

insānī huqūq kī plate meñ

rakhā kāñTā aur beḌiyoñ ko kāTne

vaalī rañg ālūd chhurī mal kar bhī

ḳhudā ke hoñToñ ko zaḳhmī nahīñ kar sakte

zamīn ko uñgliyoñ pe ghumāne vaalā masḳhara

ek din zamīn meñ aisā svārāj karegā

ki zamīn ke siine meñ chhupe din bah

kar fazā meñ phail jā.eñge

khul kar saañs lene kā tex

is qadar baḌh chukā hai ki log

baḌe ġhubbāroñ ko phaaḌ kar

apne chehroñ par chaḌhā leñge

aur ḳhvāb ta.abīr ke siine meñ aisā

ḳhanjar ghoñpegā ki ta.abīr ke ḳhuun

ke chhīñTe sūraj ke muñh par jā lageñge

aur maon ki chhatiyon se chhini

hui jawan zindagi kisi safed

parcham par girte hain aur ek baDa

dhabba ban jata hai

laundriyon mein dhule ayyam

hamare sine mein gaDhi gai

kilon par sukhae jate hain

kisi mulk ka naqsha dhabbe se

baDa nahin hota ki use dhone ke

liye aisa haiz ka KHun sarf kar diya jae

jo is liye jari ho gaya ki

hamal Thaharne ke aiwanon mein

koi sarkari harkara nahin tha

insani huquq ki plate mein

rakha kanTa aur beDiyon ko kaTne

wali rang aalud chhuri mal kar bhi

KHuda ke honTon ko zaKHmi nahin kar sakte

zamin ko ungliyon pe ghumane wala masKHara

ek din zamin mein aisa swaraj karega

ki zamin ke sine mein chhupe din bah

kar faza mein phail jaenge

khul kar sans lene ka tex

is qadar baDh chuka hai ki log

baDe ghubbaron ko phaD kar

apne chehron par chaDha lenge

aur KHwab tabir ke sine mein aisa

KHanjar ghonpega ki tabir ke KHun

ke chhinTe suraj ke munh par ja lagenge