mahr-e-nim-shab

ḳhitta-e-arz pe aisī bhī jagah hai ki jahāñ

shab meñ tārīk ujāle kā gumāñ hotā hai

aise manzar ko maiñ din yā shab-e-dījūr kahūñ

aql hairāñ hai ki aisā bhī kahāñ hotā hai

gardish-e-shams-o-qamar kā hai ajab sirr-e-nihāñ

nīm-shab duur ufuq se kahīñ kirneñ phūTīñ

aisī tartīb meñ kyā maslahat-e-yazdāñ hai

arsh aur farsh jahāñ sūrat-e-hangām mileñ

us ko taqvīm kī mī.ād se mansūb kareñ

yā ki sūraj kā zamīñ se hai bahut duur safar

apne mehvar pe guzarne meñ mah-o-sāl yahāñ

nīm-shab mahr nikaltā hai ba-andāz-e-digar

log kahte haiñ ye ma.amūl shab-o-roz kā hai

kuchh ye kahte haiñ ki mausam kā hai andāz nayā

gardish-e-arz-o-samāñ kā hai ye marbūt nizām

ye haqīqat meñ karishma hai ḳhudāvandī kā

KHitta-e-arz pe aisi bhi jagah hai ki jahan

shab mein tarik ujale ka guman hota hai

aise manzar ko main din ya shab-e-dijur kahun

aql hairan hai ki aisa bhi kahan hota hai

gardish-e-shams-o-qamar ka hai ajab sirr-e-nihan

nim-shab dur ufuq se kahin kirnen phuTin

aisi tartib mein kya maslahat-e-yazdan hai

arsh aur farsh jahan surat-e-hangam milen

us ko taqwim ki miad se mansub karen

ya ki suraj ka zamin se hai bahut dur safar

apne mehwar pe guzarne mein mah-o-sal yahan

nim-shab mahr nikalta hai ba-andaz-e-digar

log kahte hain ye mamul shab-o-roz ka hai

kuchh ye kahte hain ki mausam ka hai andaz naya

gardish-e-arz-o-saman ka hai ye marbut nizam

ye haqiqat mein karishma hai KHudawandi ka