mahrum

mirī donoñ āñkheñ jo be-dārī-e-shab kī shāhid rahīñ haiñ

mirī donoñ āñkheñ jo sone ke nāTak se uktā chukī haiñ

mirī donoñ āñkheñ jo ḳhvāboñ se is darja mahrūm haiñ jaise tū mere chhūne se hai

mirī donoñ āñkheñ jo is dukh kī maarī huī haiñ ki un ke kahe

kā koī sunñe vaalā bachā hī nahīñ hai

ajab hai ki terī tavaqqo meñ bhī sirf bāteñ haiñ merī

tujhe in ko paḌhne kī fursat nahīñ hai

mirī donoñ āñkheñ jo chaubīs pachchīs kī umr meñ bhī pachahattar kī mānind dikhne lagī haiñ

vahī donoñ āñkheñ jo tere liye tab safed-o-siyah rang kī ek tamsīl thiiñ ab bujhe pīle-pan kī numā.inda haiñ

mirī donoñ āñkheñ jo har roz college meñ dīdār se tere khil jaatī thiiñ ab vo tere na dikhne se murjhā chukī haiñ

tujhe video call par dekhnā koī majbūrī hai jo pata hī nahīñ kab machal jaatī hai aur taqāzā-e-bad meñ badal jaatī hai

maiñ pareshān huuñ ab mirī baat sun

in kī ḳhushkī samajh aa mire paas aa

saath cafe pe chal aur mire sāmne vaalī kursī pakaḌ

TikTikī bāñdh le merī āñkhoñ ko paḌh

in meñ jumbish baḌhā āḳhirī baar sulgā ye donoñ diye

taaki ye do diye hī mirī nā-rasā.ī ke asbāb hoñ

taaki ye do diye tere husn-o-kashīsh ke subuk-dariyā-e-jāñ meñ ġharqāb hoñ

meri donon aankhen jo be-dari-e-shab ki shahid rahin hain

meri donon aankhen jo sone ke naTak se ukta chuki hain

meri donon aankhen jo KHwabon se is darja mahrum hain jaise tu mere chhune se hai

meri donon aankhen jo is dukh ki mari hui hain ki un ke kahe

ka koi sunne wala bacha hi nahin hai

ajab hai ki teri tawaqqo mein bhi sirf baaten hain meri

tujhe in ko paDhne ki fursat nahin hai

meri donon aankhen jo chaubis pachchis ki umr mein bhi pachahattar ki manind dikhne lagi hain

wahi donon aankhen jo tere liye tab safed-o-siyah rang ki ek tamsil thin ab bujhe pile-pan ki numainda hain

meri donon aankhen jo har roz college mein didar se tere khil jati thin ab wo tere na dikhne se murjha chuki hain

tujhe wideo call par dekhna koi majburi hai jo pata hi nahin kab machal jati hai aur taqaza-e-bad mein badal jati hai

main pareshan hun ab meri baat sun

in ki KHushki samajh aa mere pas aa

sath cafe pe chal aur mere samne wali kursi pakaD

TikTiki bandh le meri aankhon ko paDh

in mein jumbish baDha aaKHiri bar sulga ye donon diye

taki ye do diye hi meri na-rasai ke asbab hon

taki ye do diye tere husn-o-kashish ke subuk-dariya-e-jaan mein gharqab hon