maila kapDa

bādal bādal us ke qatre

gahrī udaas chhāñv havā.eñ beva kī chūḌiyoñ kī tarah se chhan chhan

TuuT rahī haiñ

ye kaisā sāvan hai dil meñ kaalā naag yaañ Dañk mārtā hai

maiñ bādal ro.uuñ ki ḳhuun thūkūñ

ḳhuun ki qatra qatra raat ke ḳhauf se ḳhushk huā hai

raat mujhe apne haath se masal rahī hai

maiñ mailā kapḌā huuñ jo na pahanñe ke kaam aa.e na hī rakhne ke

mujh ko jalā do merī raakh havā meñ uḌā do

is raakh ke gahre aur siyāh bādal

is shahr kī chhatoñ par barseñge jin ke koḌh-zada vajūd

muddat se raushnī ko taras ga.e haiñ

aur jin ko mohabbat kī bārish hī sehat-mand kar saktī hai

vo samjheñ to

baadal baadal us ke qatre

gahri udas chhanw hawaen bewa ki chuDiyon ki tarah se chhan chhan

TuT rahi hain

ye kaisa sawan hai dil mein kala nag yan Dank marta hai

main baadal roun ki KHun thukun

KHun ki qatra qatra raat ke KHauf se KHushk hua hai

raat mujhe apne hath se masal rahi hai

main maila kapDa hun jo na pahanne ke kaam aae na hi rakhne ke

mujh ko jala do meri rakh hawa mein uDa do

is rakh ke gahre aur siyah baadal

is shahr ki chhaton par barsenge jin ke koDh-zada wajud

muddat se raushni ko taras gae hain

aur jin ko mohabbat ki barish hi sehat-mand kar sakti hai

wo samjhen to