main daryuza-gar

tum ne kabhī sochā hai

tumhārī ye gahre sannāToñ meñ Duubī ḳhāmushī is daryūza-gar par kitnī bhārī paḌtī hai

vo bāteñ jo

tumhāre mizāj-e-muallā kī nafāsatoñ pe girāñ guzartī haiñ mere liye kyā ma.anī rakhtī haiñ

kyā

kabhī tum ne pur-sukūt samundar ke andar biphrī un lahroñ kī āvāz sunī hai jo kisī tūfān kā pesh-ḳhema hotī haiñ

maiñ ne sunī hai

mujh se pūchho

tumhārī ḳhāmushī meñ lipTe kisī tūfān kā siren kyā jānte ho tum

maiñ ne sunā hai

tumhāre hoñToñ se gauhar-e-nāyāb kī tarah niklā ek ek lafz tumhārī ye ThanDe mīThe chashme jaisī bāteñ aur shīrīñ andāz-e-suḳhan sahrā meñ

chalte musāfir kī tarah mere vajūd ko sairāb kartā hai

maiñ jo tumhāre dar ke aage apnā dāman phailā.e un nāyāb motiyoñ ko chunñe kī chāhat meñ baiThī rahtī huuñ

jise kabhī to tum nā-murād lauTā dete ho kabhī bahut mehrbāñ ho kar kuchh ḳhairāt

us ke dāman meñ Daal jaate ho

jis ko maiñ tumhārī galiyoñ kī daryūza-gar kisī qīmtī asāse kī tarah

chun ke apnī poTlī meñ rakh letī huuñ

tum ne kabhi socha hai

tumhaari ye gahre sannaTon mein Dubi KHamushi is daryuza-gar par kitni bhaari paDti hai

wo baaten jo

tumhaare mizaj-e-mualla ki nafasaton pe giran guzarti hain mere liye kya mani rakhti hain

kya

kabhi tum ne pur-sukut samundar ke andar biphri un lahron ki aawaz suni hai jo kisi tufan ka pesh-KHema hoti hain

main ne suni hai

mujh se puchho

tumhaari KHamushi mein lipTe kisi tufan ka siren kya jaante ho tum

main ne suna hai

tumhaare honTon se gauhar-e-nayab ki tarah nikla ek ek lafz tumhaari ye ThanDe miThe chashme jaisi baaten aur shirin andaz-e-suKHan sahra mein

chalte musafir ki tarah mere wajud ko sairab karta hai

main jo tumhaare dar ke aage apna daman phailae un nayab motiyon ko chunne ki chahat mein baiThi rahti hun

jise kabhi to tum na-murad lauTa dete ho kabhi bahut mehrban ho kar kuchh KHairaat

us ke daman mein Dal jate ho

jis ko main tumhaari galiyon ki daryuza-gar kisi qimti asase ki tarah

chun ke apni poTli mein rakh leti hun