main ek raat thi

maiñ raat thī siyāh raat

ek nuqte meñ simTī huī

aañkh kī putlī jaise nuqte meñ

maiñ ne ek din ko bāhar nikālā

phir us din kī bā.īñ paslī se

ḳhud bāhar niklī

phir mire andar kitne sūraj chāñd aur sitāre apnī apnī manzileñ tai karne lage

maiñ raat huuñ kabhī na ḳhatm hone vaalī raat maiñ ne apnī poshāk kā rang paidā kiyā phir rangoñ se rang milte chale ga.e

maiñ raat huuñ

mere ek baazū par sub.h aur dūsre par shaam so rahe haiñ

merī chādar ke nīche

shahr qabristānoñ kī tarah paḌe hue haiñ

azāneñ ek dūsre se Takrā kar

gumbadoñ ke ās-pās

gir jaatī haiñ

log bhinbhinātī huī makkhiyoñ kī tarah

jāgte aur so jaate haiñ

ḳhud apnā lahū girāte aur chāTte haiñ

samundar chīḳhte aur dariyā reñgte

dekhtī rahtī huuñ

dekhtī rahtī huuñ chup-chāp

un kā ant

jin se phir unhī kā janam hogā

ant jo na.e janm kā biij hai

ġhurūb jo tulūa ke tasht kā ġhilāf hai

maiñ rone aur hañsne se māvarā huuñ

kabhī kabhī maañ kī mohabbat

meñ rote hue bachche

kī āvāz mujhe chauñkā detī hai

main raat thi siyah raat

ek nuqte mein simTi hui

aankh ki putli jaise nuqte mein

main ne ek din ko bahar nikala

phir us din ki bain pasli se

KHud bahar nikli

phir mere andar kitne suraj chand aur sitare apni apni manzilen tai karne lage

main raat hun kabhi na KHatm hone wali raat main ne apni poshak ka rang paida kiya phir rangon se rang milte chale gae

main raat hun

mere ek bazu par subh aur dusre par sham so rahe hain

meri chadar ke niche

shahr qabristanon ki tarah paDe hue hain

azanen ek dusre se Takra kar

gumbadon ke aas-pas

gir jati hain

log bhinbhinati hui makkhiyon ki tarah

jagte aur so jate hain

KHud apna lahu giraate aur chaTte hain

samundar chiKHte aur dariya rengte

dekhti rahti hun

dekhti rahti hun chup-chap

un ka ant

jin se phir unhi ka janam hoga

ant jo nae janm ka bij hai

ghurub jo tulua ke tasht ka ghilaf hai

main rone aur hansne se mawara hun

kabhi kabhi man ki mohabbat

mein rote hue bachche

ki aawaz mujhe chaunka deti hai