main ek sang-e-mil hun

maiñ ek sañg-e-mīl huuñ

har musāfir merī jānib

dekhtā hai lā-shu.ūrī taur par

aur apne zehn meñ rakkhe hue

har qadam tasḳhīr-e-manzil kā ḳhayāl

baḌhtā jaatā hai vo apnī raah par

bebasī kā merī aalam dekhiye

jāmid-o-sākit huuñ maiñ apnī jagah

kyuuñ ki

maiñ ek sañg-e-mīl huuñ

jaane kitne log guzre

aur guzreñge isī ik raah se

har kisī ko apnī manzil kī hai dhun

koī hañstā aur koī rotā hai

koī apnī fikr meñ Duubā huā

tund tūfāñ kī tarah baḌhtā koī

laḌkhaḌāte paañv aur thakan se chuur jism

sab ke chehroñ kā ta.assur

dekhtā rahtā huuñ maiñ

har musāfir ke ta.iiñ

sochtā rahtā huuñ maiñ aksar yahī

us kī manzil us ko mil pā.egī kyā

main ek sang-e-mil hun

har musafir meri jaanib

dekhta hai la-shuuri taur par

aur apne zehn mein rakkhe hue

har qadam tasKHir-e-manzil ka KHayal

baDhta jata hai wo apni rah par

bebasi ka meri aalam dekhiye

jamid-o-sakit hun main apni jagah

kyun ki

main ek sang-e-mil hun

jaane kitne log guzre

aur guzrenge isi ek rah se

har kisi ko apni manzil ki hai dhun

koi hansta aur koi rota hai

koi apni fikr mein Duba hua

tund tufan ki tarah baDhta koi

laDkhaDate panw aur thakan se chur jism

sab ke chehron ka tassur

dekhta rahta hun main

har musafir ke tain

sochta rahta hun main aksar yahi

us ki manzil us ko mil paegi kya