main jab main se bahar nikla

maiñ jab maiñ se bāhar niklā

maiñ ne pūchhā kaun hai to ḳhāmoshī thī

koī nahīñ thā ek dhuñdalkā chhāyā thā

sūraj bhī kirnoñ ko sameTe tārīkī meñ leTā thā

ā.īne par raakh jamī thī kohre kī sī

raakh ki jis meñ koī sūrat

saaf nazar aatī hī nahīñ thī

merī sūrat mere zehn se mahv thī lekin

ā.īne par raakh jamī thī

maiñ jab maiñ se bāhar niklā

shahr meñ saa.e hī saa.e the koī nahīñ thā

jaise hiroshima meñ atom bam kā dhamāka

keñchulī sab ke jismoñ kī rūhoñ se utāre

har-sū aise phail rahā thā

jaise us ne vaqt ko maut ke ghaaT utārā

shahr the yā sahrā the jin meñ bādal ban kar

narm bagūle

bāñhoñ meñ bāñheñ Daale yuuñ naach rahe the

jaise shām-o-sahar kā chakkar TuuT gayā ho

jaise vo āzād hue hoñ shām-o-sahar se

maiñ jab maiñ se bāhar niklā

vaqt ne mere hāthoñ meñ ik lamha rakkhā

aur kahā ye lamha terā hai jā le jā

ye lamha jo nūr-e-azal hai

ye lamha jo bahr-e-abad hai

is lamhe kī kokh meñ jannat bhī hai nār-e-jahannam bhī

is lamhe ko tū jaisā bhī chāhegā ban jā.egā

ye lamha terā lamha hai

apne jism meñ rakh le tū ye ik dhaḌkan hai

apnī aañkh se Tapkā le tū ik aañsū hai

havas kī miTTī meñ bo.egā lamhoñ kā ambār lagegā

ishq kī aañch dikhā.egā to terā lamha

ġhār-e-hirā meñ tuur kī jot jagā.egā

ab maiñ apne aap meñ aa kar soch rahā huuñ

is lamhe ko biich ke donoñ vaqt kī roTī khā luuñ maiñ

yā us ko ik phuul banā kar

terī zulfoñ meñ rakh duuñ aur apnā pyaar jatā luuñ

maiñ

main jab main se bahar nikla

main ne puchha kaun hai to KHamoshi thi

koi nahin tha ek dhundalka chhaya tha

suraj bhi kirnon ko sameTe tariki mein leTa tha

aaine par rakh jami thi kohre ki si

rakh ki jis mein koi surat

saf nazar aati hi nahin thi

meri surat mere zehn se mahw thi lekin

aaine par rakh jami thi

main jab main se bahar nikla

shahr mein sae hi sae the koi nahin tha

jaise hiroshima mein atom bam ka dhamaka

kenchuli sab ke jismon ki ruhon se utare

har-su aise phail raha tha

jaise us ne waqt ko maut ke ghaT utara

shahr the ya sahra the jin mein baadal ban kar

narm bagule

banhon mein banhen Dale yun nach rahe the

jaise sham-o-sahar ka chakkar TuT gaya ho

jaise wo aazad hue hon sham-o-sahar se

main jab main se bahar nikla

waqt ne mere hathon mein ek lamha rakkha

aur kaha ye lamha tera hai ja le ja

ye lamha jo nur-e-azal hai

ye lamha jo bahr-e-abad hai

is lamhe ki kokh mein jannat bhi hai nar-e-jahannam bhi

is lamhe ko tu jaisa bhi chahega ban jaega

ye lamha tera lamha hai

apne jism mein rakh le tu ye ek dhaDkan hai

apni aankh se Tapka le tu ek aansu hai

hawas ki miTTi mein boega lamhon ka ambar lagega

ishq ki aanch dikhaega to tera lamha

ghaar-e-hira mein tur ki jot jagaega

ab main apne aap mein aa kar soch raha hun

is lamhe ko bich ke donon waqt ki roTi kha lun main

ya us ko ek phul bana kar

teri zulfon mein rakh dun aur apna pyar jata lun

main